بابراعظم تیسری مرتبہ ’آئی سی سی پلئیر آف دی منتھ‘ کا اعزاز حاصل کرنے میں کامیاب
گزشتہ ماہ اگست میں شاندار کاکردگی پر انہیں اعزاز سے نوازا گیا -فوٹو: کرک انفو
شاداب خان اور نکولس پورن کو بھی اگست 2023ء کے بہترین پلیئرز کی فہرست میں شامل کیا گیاتھا
انٹرنیشنل کرکٹ کونسل (آئی سی سی) نے اگست 2023ء کیلئے قومی ٹیم کے کپتان بابراعظم کو پلیئر آف دی منتھ نامزد کردیا۔آئی سی سی ون ڈے رینکنگ میں عالمی نمبر ایک قومی ٹیم کے کپتان بابراعظم کو غیرمعمولی کارکردگی کا مظاہرہ کرنے پر انہیں مینز پلیئر آف دی منتھ کا تاج پہنایا گیا، بابر نے یہ اعزاز تیسری مرتبہ حاصل کیا۔انہوں نے کہا کہ پچھلا مہینہ میری ٹیم اور میرے لیے غیر معمولی رہا کیونکہ ہم نے کچھ شاندار پرفارمنس دیں جبکہ عالمی رینکنگ میں پہلی پوزیشن بھی حاصل کی۔کپتان بابراعظم کو ایشیاءکپ میں نیپال کے خلاف شاندار 151 رنز کی اننگز کھیلنے جبکہ افغانستان کے خلاف پاکستان کو 0-3 سے کامیابی دلوانے میں اہم کردار ادا کرنے پر ٹاپ تھری میں شامل کیا گیا تھا۔ان کے علاوہ آئی سی سی نے گزشتہ ہفتے نائب کپتان شاداب خان اور ویسٹ انڈیز کے نکولس پورن کو اگست 2023ء کے بہترین پلیئرز کی فہرست میں شامل کیا تھا۔
