نگران حکومت کے لیے پٹرولیم مصنوعات کی قیمتوں میں کمی کا یہ پہلا موقع

ڈالر کے مقابلے میں روپے کی قدر میں تقریباً 10.5 روپے کا اضافہ بھی ہوا ہے

رپورٹ کے مطابق عالمی منڈی میں خام تیل 101 ڈالر فی بیرل سے سستا ہو کر 99 ڈالر فی بیرل پر آ گیا ہے
لاہور: ڈالر کے مقابلے پاکستانی روپے کی قدر میں استحکام کے باعث 2 ماہ بعد پٹرولیم مصنوعات کی قیمتوں میں کمی کا امکان ظاہر کیا جا رہا ہے۔ذرائع کے مطابق عالمی مارکیٹ میں خام تیل کی قیمتیں کم ہوئی ہیں تاہم ملک میں پٹرولیم مصنوعات کی قیمتوں سے متعلق وزارت خزانہ، نگران وزیر اعظم سے مشاورت کے بعد قیمتوں میں ردو بدل کا حتمی فیصلہ کرے گی۔واضح رہے کہ یکم اگست سے 15 ستمبر کے درمیان پٹرول اور ہائی سپیڈ ڈیزل کی قیمتوں میں بالترتیب 78.38 روپے اور 75.73 روپے فی لٹر اضافہ ہو چکا ہے جبکہ نگران حکومت کے لیے پٹرولیم مصنوعات کی قیمتوں میں کمی کا یہ پہلا موقع ہو گا۔پٹرول اور ہائی سپیڈ ڈیزل فی لٹر ریٹیل سطح پر 331 سے 333 روپے میں فروخت ہو رہا ہے۔ذرائع کے مطابق ڈیزل اور پٹرول کی قیمتوں میں تقریباً 5 روپے سے 19 روپے فی لٹر کمی کا امکان ظاہر کیا جا رہا ہے۔رپورٹ کے مطابق عالمی منڈی میں خام تیل 101 ڈالر فی بیرل سے سستا ہو کر 99 ڈالر فی بیرل پر آ گیا ہے اور ڈالر کے مقابلے میں روپے کی قدر میں تقریباً 10.5 روپے کا اضافہ بھی ہوا ہے۔