پاک بھارت میچ کا بخار، احمد آباد کے ہسپتالوں میں رش بڑھ گیا

ڈاکٹروں نے مقامی میڈیا کو بتایا کہ چیک اَپ “پیکیجز” کے لیے رش سستی رہائش تلاش کرنے کا ایک اسمارٹ آئیڈیا ہے-فوٹو: فائل

پاک بھارت میچ سے قبل بھارتی شہر احمد آباد کے ہسپتالوں میں اچانک مریضوں کا رش بڑھ گیا ہے
احمد آباد: پاک بھارت میچ سے قبل کرکٹ کے بخار نے احمد آباد کو اپنی لپیٹ میں لے لیا۔کرکٹ ورلڈکپ 2023ء کے 14 اکتوبر کو شیڈول پاک بھارت میچ سے قبل بھارتی شہر احمد آباد کے ہسپتالوں میں اچانک مریضوں کا رش بڑھ گیا ہے۔ کئی ہسپتالوں میں پرائیویٹ رومز کی بکنگ کرالی گئی ہے۔بھارتی میڈیا کے مطابق احمد آباد کے ہسپتالوں میں اچانک مریضوں نے چیک اپ کے لیے پرائیویٹ رومز کی بکنگ کرالی ہے جس میں روایتی حریفوں کے میچ سے قبل ایک رات کا قیام شامل ہے۔ڈاکٹروں نے مقامی میڈیا کو بتایا کہ چیک اَپ “پیکیجز” کے لیے رش سستی رہائش تلاش کرنے کا ایک اسمارٹ آئیڈیا ہے کیونکہ میچ سے پہلے ہوٹل کے کرایوں میں 20 گنا تک اضافہ ہوچکا ہے۔احمد آباد میڈیکل ایسوسی ایشن کے صدر تشار پٹیل نے رائٹرز کو بتایا کہ پہلے بھی ایسے معاملات دیکھنے میں آئے ہیں کہ لوگ پاک بھارت میچ دیکھنے کے لیے آتے ہیں اور اس دوران وہ اپنے طبی معائنے اور ہسپتالوں میں قیام کے لیے بھی وقت لیتے ہیں۔احمد آباد ہاسپٹل اینڈ نرسنگ ہومز ایسوسی ایشن نے اپنے ممبران کو تنبیہ کی ہے کہ وہ ایسے شائقین کو جگہ نہ دیں۔ ایسوسی ایشن کے صدر کا کہنا ہے کہ ہسپتال ایسی درخواستوں پر غور نہ کریں کیونکہ ہسپتال بطور ہوٹل استعمال کے لیے نہیں ہیں۔خیال رہے کہ پاک بھارت میچ کا شائقین کی جانب سے بے صبری سے انتظار کیا جاتا ہے۔ 29 اگست کو پہلے مرحلے میں میچ کے تمام ٹکٹس صرف ایک گھنٹے میں فروخت ہوگئے تھے۔