غزہ میں فلسطینیوں پر حملے، بولیویا نے اسرائیل سے سفارتی تعلقات ختم کردئیے
اسرائیل کے حملے قابل مذمت ہیں ناکہ بندی فوری طور پر ختم کی جائے، بولیویا-فوٹو:فائل
لاپاز: غزہ میں نہتے فلسطینیوں پر مظالم کیخلاف لاطینی امریکا کے ملک بولیویا نے اسرائیل سے سفارتی تعلقات ختم کردئیے۔
غیرملکی میڈیا کے مطابق غزہ میں اسرائیل کی فلسطینیوں کے خلاف انسانیت سوز کارروائیوں پر احتجاج کرتے ہوئے چلی اور کولمبیا نے بھی اسرائیل سے اپنے سفیر واپس بلانے کا اعلان کردیا۔بولیویا کی ایوان صدر کی وزیر ماریہ نیلا پراڈا اور خارجہ امور کے وائس چانسلر فریڈی ممانی نے بیان میں اسرائیلی حملوں کی مذمت اور حملے فوری روکنے کا مطالبہ کرتے ہوئے غزہ کی ناکہ بندی فوری طور پر ختم کرنے کا مطالبہ کیا۔دوسری جانب مہاجر کیمپ پر اسرائیل کی وحشیانہ بمباری سے انٹرنیٹ اور موبائل سروس کا نظام تباہ ہوگیا جس کے نتیجے میں غزہ کا رابطہ ایک بار پھر دنیا سے ختم ہوگیا۔ غزہ پر اسرائیلی حملو ں سے مزید 219 فلسطینی شہید ہوگئے۔
