نگران حکومت کا ذکاء اشرف کو ورلڈکپ فائنل2023ء تک توسیع دینے کا فیصلہ

وزیراعظم نے شاہد آفریدی کو پی سی بی میں اہم عہدہ دینے کی پیش کش کی ہے-فوٹو: فائل

ابھی ورلڈ کپ چل رہا ہے، اس لیے کوئی قدم اٹھانا مناسب نہ ہوگا،انوار الحق کاکڑ
لاہور: حکومت کا پی سی بی مینجمنٹ کمیٹی اور سربراہ ذکاء اشرف کی مدت ملازمت میں ورلڈ کپ فائنل تک توسیع کا فیصلہ کرلیا ہے۔پی سی بی کے موجودہ پیٹرن نگران وزیراعظم انوار الحق کاکڑ نے ایک انٹرویو میں واضح کیا ہے کہ ابھی چوںکہ ورلڈ کپ چل رہا ہے۔ اس لیے کوئی قدم اٹھانا مناسب نہ ہوگا۔ ورلڈکپ ختم ہونے کے بعد یہ معاملہ دیکھا جائے گا۔یاد رہے کہ ذکاء اشرف کی سربراہی میں کام کرنے والی پی سی بی مینجمنٹ کمیٹی کی مدت چار نومبر کو پوری ہورہی ہے، جس کی وجہ سے مینجمنٹ کمیٹی اور چیئرمین کی تبدیلی کی قیاس آرائیاں جاری ہیں تاہم اب وزیراعظم کے اس بیان کے بعد یہ معاملہ ٹھپ گیا ہے۔ذکاء اشرف مینجمنٹ کمیٹی کی مدت میں توسیع کے حوالے سے ابھی باقاعدہ نوٹیفیکیشن جاری ہونا باقی ہے۔ ورلڈکپ کا فائنل انیس نومبر کو طے ہے۔ اس سے پہلے آحمد آباد میں اٹھارہ نومبر کو آئی سی سی کی میٹنگ بھی شیڈول ہے۔واضح رہے کہ ایک روز قبل نگراں وزیراعظم انوار الحق کاکڑ نے سابق کرکٹر شاہد خان آفریدی سے اہم ملاقات کی تھی۔ مختلف ذرائع سے سامنے آنی والی خبروں میں دعویٰ کیا جارہا ہے کہ وزیراعظم نے شاہد آفریدی کو پی سی بی میں اہم عہدہ دینے کی پیش کش کی ہے جس پر سابق کپتان نے سوچنے کیلئے مہلت مانگی ہے۔