پاکستان بھاشا ڈیم کیلیے ایک ارب ڈالر کا فوری انتظام کرنے کیلئے کوشاں

بھاشا ڈیم کیلئے 3.5 ارب ڈالر درکار، کام جاری رکھنے کیلئے مستقبل قریب میں ایک ارب ڈالر کی ضرورت ہے، ذرائع -فوٹو: فائل

اسلام آباد: پاکستان دیامر بھاشا ڈیم کیلیے فاسٹ ٹریک بنیادوں پر ایک ارب ڈالر کا انتظام کرنے کیلئے کوشاں ہے۔
ذرائع کےمطابق بھاشا ڈیم کی تکمیل کیلئے تقریباً ساڑھے 3 ارب ڈالر درکار ہیں جن میں سے ایک ارب ڈالر کی مستقبل قریب میں ضرورت ہے۔ نگران وزیراعظم انوارالحق کاکڑ کے حالیہ دورہ کویت کے دوران اس پراجیکٹ کیلئے فنڈز اکٹھے کرنے کیلئے کویتی حکومت کے ساتھ معاہدے پر دستخط کیے گئے ہیں۔ذرائع کے مطابق کویت کے ساتھ سرمایہ کاری میں تعاون کے معاہدے سے غازی بروتھا ہائیڈرو پراجیکٹ میں ایکویٹی شمولیت کے ذریعے بھاشا ڈیم کیلئے سرمائے کے حصول میں مدد ملے گی۔ پاکستان بھاشا ڈیم کیلئے فنڈز کے حصول کیلئے ایک عرصہ سے کوشاں ہے تاہم بھارت کی لابنگ کہ منصوبہ متنازع علاقے میں بن رہا ہے کی وجہ سے ملٹی لیٹرل ڈونرز اس منصوبے کیلئے سرمایہ فراہم کرنے سے انکار کر چکے ہیں۔تاہم حالیہ برسوں میں پاکستان نے اس منصوبے کیلئے کوششیں تیز کی ہیں اور اور اس کیلئے سرمائے کے حصول کے قریب پہنچ چکا ہے۔ بھاشا ڈیم پر کام جاری رکھنے کیلئے پاکستان کو مستقبل قریب میں ایک ارب ڈالر کی فنانسنگ کی ضرورت ہے۔نگران وزیراعظم کے حالیہ دورہ کویت کے دوران سرمایہ کاری کے حوالے سے متعدد معاہدوں پر دستخط کئے گئے۔ وزیر آبی وسائل نے کابینہ کو بتایا کہ کویت کی سرمایہ کاری سے پاکستان مختلف شعبوں بالخصوص ہائیڈر پاور سیکٹر میں فائدہ اٹھا سکتا ہے۔