اسلام آباد میں نئے سال کی تمام تقریبات منسوخ کرنے کا نوٹی فکیشن جاری
ایک روز قبل نگران وزیراعظم نے فلسطینیوں سے اظہار یکجہتی کیلئے سال نو کی تقریبات پر پابندی کا اعلان کیا گیا تھا-فوٹو: فائل
حکومتی اعلان پر نئے سال پرہونے والی تمام تقریبات کے جاری کردہ این او سیز منسوخ کردیئے گئے، اسلام آبادانتظامیہ
اسلام آباد: نگراں وزیر اعظم انوار الحق کاکڑ کے اعلان کی روشنی میں وفاقی دارالحکومت کی انتظامیہ نے سال نو کے حوالے سے تمام تقریبات منسوخ کرنے کا نوٹی فکیشن جاری کردیا۔فلسطینیوں سے اظہار یکجہتی کیلئے حکومتی اعلان پر اسلام آباد کی انتظامیہ نے نئے سال کے حوالے سے ہونے والی تمام تقریبات کے جاری کردہ این او سیز منسوخ کردیئے۔ذرائع کے مطابق ڈپٹی کمشنر اسلام آباد کی ہدایت پر اجازت نامے منسوخ کیے گئے جس کے بعد تقریبات کی منسوخی کا نوٹی فکیشن بھی جاری کردیاگیا۔واضح رہے کہ ایک روز قبل نگران وزیراعظم کی جانب سے فلسطینیوں سے اظہار یکجہتی کیلئے سال نو کی تقریبات پر پابندی کا اعلان کیا گیا تھا۔وزیراعظم نے اپنے بیان میں کہا تھا کہ حکومت سطح پر سال نو کے حوالے سے کسی بھی تقریب کا انعقاد نہیں کیا جائے گا جبکہ انہوں نے عوام سے اپیل کی تھی کہ وہ بھی مظلوم و نہتے فلسطینیوں سے اظہار یکجہتی کیلئے نئے سال کو سادگی سے خوش آمدید کہیں۔
