عدالت نے ٹرمپ کو انتخابی مہم میں مشہور زمانہ گانا چلانے سے روکدیا
ٹرمپ پر گانے کے شریک مصنف کے اہل خانہ کی جانب سے گزشتہ ماہ ڈونلڈ ٹرمپ پر مقدمہ دائر کیا گیا تھا-
مقدمے میں الزام لگایا گیا تھا کہ ٹرمپ اور ان کے کئی اتحادیوں نے انتخابی مہم میں گانے کا استعمال کیا لیکن نہ اجازت لی اور نہ کوئی ادائیگی کی اس لیے انہیں ہرجانہ ادا کرنا چاہیے
اٹلانٹا: گانے کے بول لکھنے والے شریک مصنف کے اہل خانہ کی طرف سے قانونی چارہ جوئی پر عدالت نے ٹرمپ کو انتخابی مہم کے دوران گانا ’’ہولڈ آن، آئی ایم کمنگ‘‘ کے استعمال سے روک دیا۔عالمی خبر رساں ادارے کے مطابق اٹلانٹا کی وفاقی عدالت نے اپنے فیصلے میں کہا کہ ڈونلڈ ٹرمپ کا مذکورہ گانے کا استعمال کاپی رائٹ کی خلاف ورزی ہے جب کہ ان کے خلاف عدالت میں اس پر کیس بھی چل رہا ہے۔خیال رہے کہ گانے کے شریک مصنف کے اہل خانہ کی جانب سے گزشتہ ماہ ڈونلڈ ٹرمپ پر مقدمہ دائر کیا گیا تھا۔مقدمے میں الزام لگایا گیا تھا کہ ٹرمپ اور ان کے کئی اتحادیوں نے انتخابی مہم میں گانے کا استعمال کیا لیکن نہ اجازت لی اور نہ کوئی ادائیگی کی اس لیے انہیں ہرجانہ ادا کرنا چاہیے۔
یہ مقدمہ گانے کے شریک لکھاری کے بیٹے نے کیا تھا جس پر ڈسٹرکٹ جج نے فیصلہ دیا کہ ٹرمپ کو گانا استعمال کرنا بند کرنا چاہیے تاہم انھوں نے گانے پر مشتمل کسی بھی ویڈیوز کو ہٹانے کا حکم دینے سے انکار کردیا۔
ٹرمپ اور ان کی انتخابی مہم کے وکیل رونالڈ کولمین نے سماعت کے بعد صحافیوں سے گفتگو میں کہا کہ ہم نے پہلے ہی گانا استعمال نہ کرنے پر رضامندی ظاہر کرد ی تھی۔ ہم کسی کو ناراض کرنے یا تکلیف پہنچانے میں کوئی دلچسپی نہیں رکھتے۔یاد رہے کہ یہ گانا 1966ء کا مقبول ترین گانا تھا جسے ہیز نے لکھا تھا جو 2008ء میں 65 سال کی عمر میں انتقال کر گئے تھے۔ ان کے ساتھ شریک مصنف ڈیوڈ پورٹر تھے۔
