ملک کے بیشتر علاقوں میں موسم سرد اور خشک رہنے کا امکان

مری اور گلیات میں صبح کے اوقات میں ہلکی بارش و برفباری ہوسکتی ہے

اسلام آباد :(جاگیرنیوز) ملک کے بیشترعلاقوں میں موسم سرد اور خشک رہنے کا امکان ہے۔
محکمہ موسمیات کا کہنا ہے کہ تاہم دن کے اوقات میں گلگت بلتستان، بالائی خیبرپختونخوا اور کشمیر میں چند مقامات پرہلکی بارش اور برفباری متوقع ہے ، مری اور گلیات میں صبح کے اوقات میں ہلکی بارش و برفباری ہوسکتی ہے ۔موسم کا احوال بتانے والوں نے کہا کہ اسلام آباد، بالائی پنجاب اور خیبرپختونخوا کے میدانی علاقوں میں صبح کے اوقات میں بعض مقامات پر کہرا پڑنے جبکہ وسطی و جنو بی پنجاب اور بالائی سندھ میں بعض مقامات پر صبح کے اوقات میں ہلکی دُھند چھائے رہنے کی توقع ہے۔محکمہ موسمیات کے مطابق پہاڑی علاقوں میں موسم شدید سرد رہا، تاہم استور میں 1انچ برفباری ریکارڈ کی گئی۔دوسری جانب موسم کا احوال بتانے والوں کا کہنا ہے کہ آج ریکارڈ کئے گئے کم سےکم درجہ حرارت میں لہہ منفی10، گوپس منفی 7، سکردو، استور، کالام اور قلات میں منفی6 رہا۔علاوہ ازیں زیارت، بگروٹ، چترال منفی 5،گلگت، ہنزہ، دیر، کوئٹہ، مالم جبہ منفی 4، دروش اور پاراچنار میں منفی 3 ڈگری سینٹی گریڈ ریکارڈ کیا گیا۔