صدر آصف زرداری سے وزیر اعظم شہباز شریف کی ملاقات، ملکی سیاسی صورتحال پر گفتگو
دونوں رہنماؤں نے قانونی امور پر تمام سیاسی سٹیک ہولڈرز کی مشاورت سے آگے بڑھنے کا فیصلہ کیا
اسلام آباد: (جاگیرنیوز) صدر مملکت آصف علی زرداری سے وزیر اعظم محمد شہباز شریف نے ایوانِ صدر میں ملاقات کی۔
ملاقات میں نائب وزیر اعظم و وزیرِ خارجہ سینیٹر محمد اسحاق ڈار اور وفاقی وزیر داخلہ سید محسن رضا نقوی نے بھی شرکت کی۔گورنر خیبر پختونخوا فیصل کریم کنڈی، سابق وزیر آعظم راجہ پرویز اشرف اور ممبر قومی اسمبلی سید نوید قمر بھی ملاقات میں شریک ہوئے۔وزیرِ آعظم شہباز شریف نے صدر آصف علی زرداری کی صحت کیلئے نیک خواہشات کا اظہار کیا، ملاقات میں ملک کی مجموعی سیاسی ، معاشی اور سکیورٹی صورتحال پر گفتگو کی گئی۔صدر مملکت اور وزیرِ اعظم نے ملکی ترقی کیلئے مل کر آگے بڑھنے کے عزم کا اعادہ کیا، صدر مملکت اور وزیر اعظم نے پارلیمنٹ میں قانون سازی کے امور پر بھی بات چیت کی۔دونوں رہنماؤں نے قانونی امور پر تمام سیاسی سٹیک ہولڈرز کی مشاورت سے آگے بڑھنے کا فیصلہ کیا، صدر مملکت نے وزیر اعظم کو ملکی ترقی اور استحکام کیلئے تعاون کی یقین دہانی کرائی۔
