جناح سکوائر کا افتتاح، ٹریفک روانی بہتراور آلودگی کم ہوگی : وزیر اعظم

جس ذمہ داری اور احساس فرض شناسی سے اس منصوبے کو صرف 72 دنوں میں مکمل کیا گیا ہے، وہ اپنی جگہ ایک ریکارڈ ہے

اسلام آباد:(جاگیر نیوز) وزیراعظم شہباز شریف نے جناح سکوائر کا افتتاح کردیا۔
اسلام آباد میں افتتاحی تقریب سے خطاب ہوتے کرتے ہوئے شہباز شریف کا کہنا تھا کہ آج اسلام آباد میں ٹریفک کے بہاؤ سے متعلق جناح سکوائر منصوبہ مکمل ہوا، اس منصوبے سے اسلام آباد کے ٹریفک کی روانی میں بہتری آئے گی۔انہوں نے کہا کہ جناح سکوائر منصوبے سے آلودگی میں بھی کمی آئے گی کیوں کہ ٹریفک جام نہیں ہوگا تو آلودگی بھی نہیں پھیلے گی اور سب سے بڑھ کر لوگوں کا قیمتی وقت بھی محفوظ ہوگا۔محمد شہباز شریف کا کہنا تھا کہ جس ذمہ داری اور احساس فرض شناسی سے اس منصوبے کو صرف 72 دنوں میں مکمل کیا گیا ہے، وہ اپنی جگہ ایک ریکارڈ ہے اور اس کے لیے محسن نقوی کو بھرپور خراج تحسین پیش کرنا چاہتا ہوں، انہوں نے اسلام آباد میں پنجاب سپیڈ کو محسن سپیڈ میں تبدیل کردیا ہے۔وزیر اعظم نے کہا کہ یہ ہم سب کے لیے خوشی کا موقع ہونا چاہیے جس کا ہم سب کو جشن منانا چاہیے کیوں کہ یہی وہ طریقہ ہے جو قوموں کی زندگی کو بدل دیتا ہے۔ان کا محسن نقوی کو شاباش دیتے ہوئے کہنا تھا کہ اسی طریقے سے آپ باقی منصوبوں کو بھی رفتار کو اسی طریقے سے بڑھا کر تکمیل تک پہنچائیں اور 1960ء کی دہائی میں جو سرکاری عمارات بنی تھیں ان کو بھی توجہ کی ضرورت ہے، اور مجھے سن کر خوشی ہوئی کہ آپ اس پر بھی توجہ دے رہے ہیں۔محمد شہباز نے وزیر داخلہ کو مخاطب کرتے ہوئے کہا کہ میں نے آپ کو اسلام آباد کی خوبصورتی سے متعلق جو تجویز دی ہےاس شہر کو پاکستان بھر میں خوبصورتی کے حوالے سے ایک مثال بنا دیں، اور مجھے یقین ہے آپ اس منصوبے کو بہت جلد پایہ تکمیل تک پہنچائیں گے۔آخرمیں وزیر اعظم کا کہنا تھا کہ شنگھائی تعاون تنظیم کے حوالے سے بھی میں آپ لوگوں کو مبارکباد دینا چاہتا ہوں کیوں کہ اسلام آباد میں آنے والے غیر ملکی مہمانوں نے اسلام آباد کی خوبصورتی کی بہت تعریف کی، لہذا میں دوبارہ گزارش کروں گا کہ اس شہر کی خوبصورتی میں مزید اضافہ کریں۔