وزیراعظم کی گوادر پورٹ کو کمرشل بنیادوں پر آپریشنلائز کرنے کیلئے اقدامات کی ہدایت
گودار پورٹ کے حوالے سے بہترین مارکیٹنگ اور آگاہی کی حکمت عملی بنائی جائے اورسفارتی کوششیں تیز کی جائیں
اسلام آباد: (جاگیرنیوز) وزیراعظم محمد شہباز شریف کے زیر صدارت وفاقی کابینہ کا اجلاس ہوا، وزیر اعظم نے گوادر پورٹ کو کمرشل بنیادوں پر آپریشنلائز کرنے کے لئے فوری اقدامات کی ہدایت کر دی۔
وزیراعظم شہباز شریف نے گوادر پورٹ کی آپریشنلائزیشن کے حوالےسے وفاقی وزیر منصوبہ بندی احسن اقبال کے زیر صدارت کمیٹی تشکیل دینے کی ہدایت کی، کمیٹی گوادر پورٹ کو جدید اور مکمل فعال بندرگاہ بنانے کے حوالے سے تمام سٹیک ہولڈرز کے ساتھ مل کر کام کرے گی۔شہباز شریف نے گوادر پورٹ کی افادیت سے آگاہی کے حوالے سے انٹرنیشنل کانفرنس کا انعقاد کرنے کے احکامات جاری کئے۔وزیر اعظم نے کہا کہ گودار پورٹ کے حوالے سے بہترین مارکیٹنگ اور آگاہی کی حکمت عملی بنائی جائے اور گوادر پورٹ کے حوالے سے سفارتی کوششیں تیز کی جائیں۔وزیر اعظم نے گوادر پورٹ سے کی جانے والی درآمدات اور بر آمدات کی تفصیل بھی طلب کر لی، شہباز شریف کے زیر صدارت وفاقی کابینہ کا اجلاس آج وزیراعظم ہاؤس اسلام آباد میں منعقد ہوا۔وفاقی کابینہ کو وفاقی وزیر منصوبہ بندی احسن اقبال کی جانب سے گوادر پورٹ پر تفصیلی بریفنگ دی گئی۔
