صدر مملکت نے بینکوں سے متعلق انکم ٹیکس ترمیمی آرڈیننس جاری کر دیا

نئے آرڈیننس کے تحت بینکنگ ٹیکس کی شرح 44 فیصد تک بڑھنے سے حکومت 31 دسمبر تک 70 ارب روپے کمائے گی

اسلام آباد: (جاگیر نیوز) صدر آصف علی زرداری نے بینکوں کے ٹیکس ڈھانچے پر نظرثانی سے متعلق انکم ٹیکس (ترمیمی) آرڈیننس جاری کر دیا۔
نئے آرڈیننس کے تحت بینکنگ ٹیکس کی شرح 44 فیصد تک بڑھنے سے حکومت 31 دسمبر تک 70 ارب روپے کمائے گی، صدر آصف علی زرداری نے پیر کی شب انکم ٹیکس (ترمیمی) آرڈیننس، 2024ء جاری کیا۔انکم ٹیکس آرڈیننس، 2001ء کے پہلے اور ساتویں شیڈول میں ترمیم کرکے بینکوں کے ٹیکس کے ڈھانچے میں اہم تبدیلیاں کی گئیں، آرڈیننس کے تحت بینکنگ کمپنیوں کے لیے ٹیکس سال 2025ء کے لیے 44 فیصد ٹیکس کی شرح مقرر کی گئی ہے۔2026ء میں یہ شرح 43 فیصد اور 2027ء اور اس کے بعد کے برسوں کے لیے 42 فیصد ہو جائے گی، چھوٹی کمپنیوں کے لیے، ٹیکس کی شرح 20 فیصد پر برقرار ہے، جب کہ دیگر تمام کمپنیوں کے لیے، یہ 29 فیصد ہے۔توقع ہے کہ 31 دسمبر 2024ء تک بینکنگ سیکٹر سے تقریباً 70 ارب روپے جمع ہوں گے، رواں مالی سال میں محصولات کی کمی کو کم کرنے کی توقع ہے، آرڈیننس میں بینکوں کے لیے مجموعی ایڈوانس سے ڈیپازٹ تناسب کی گنتی کے طریقہ کار کی بھی وضاحت کی گئی ہے۔