کراچی، تیز رفتار خونی ٹرالر نے ایک اور نوجوان کو موت کی نیند سلا دیا

ٹرالر کو تحویل میں لے لیا گیا ہے، تاہم ڈرائیور جائے وقوعہ سے فرار ہونے میں کامیاب ہو گیا

کراچی:(جاگیرنیوز)شہر قائد میں شاہ لطیف کے علاقے ملیر میں تیز رفتار ٹرالر کی ٹکر سے موٹر سائیکل سوار ایک شخص جاں بحق جبکہ دوسرا زخمی ہوگیا۔
حادثہ کے بعد ٹرالر کا ڈرائیور گاڑی چھوڑ کر فرار ہوگیا، جس کے بعد پولیس نے ٹرالر کو تحویل میں لے کر تھانہ منتقل کر دیا ہے۔
ایس ایچ او شاہ لطیف، راجہ عباس نے میڈیا کو بتایا کہ واقعہ شاہ لطیف ملیر انور بلوچ ہوٹل کے قریب پیش آیا، جہاں تیز رفتار ٹرالر نے موٹر سائیکل سوار دو افراد کو ٹکر مار دی۔جاں بحق شخص کی شناخت 45 سالہ عامر ولد غلام مصطفی کے طور پر ہوئی، جبکہ زخمی کی شناخت 35 سالہ ساجد ولد محمد ہاشم کے طور پر کی گئی۔ایدھی حکام کے مطابق، جاں بحق اور زخمی دونوں آپس میں رشتہ دار ہیں اور انہیں فوری طور پر جناح اسپتال منتقل کیا گیا۔حادثے کے بعد ٹرالر کا ڈرائیور گاڑی چھوڑ کر فرار ہوگیا۔ پولیس نے اس کی تلاش شروع کر دی ہے اور ٹرالر کو تحویل میں لے کر تھانہ منتقل کر دیا ہے۔متوفی عامر کے کزن عبدالرحمن نے جناح اسپتال میں میڈیا کو بتایا کہ ساجد، عامر کا ماموں اور متوفی عامر اس کا کزن تھا۔ عبدالرحمن کے مطابق، ہم دونوں موٹر سائیکلوں پر اپنے کزن کو کینٹ اسٹیشن چھوڑ کر واپس قائد آباد آ رہے تھے کہ ملیر انور بلوچ ہوٹل کے قریب تیز رفتار ٹرالر نے ہماری ایک موٹر سائیکل کو ٹکر مار دی، جس کے نتیجے میں عامر جاں بحق اور ساجد زخمی ہوگیا۔متوفی عامر پیدائشی گونگا اور بہرا تھا اور چند ماہ قبل اس نے پسند کی شادی کی تھی۔ وہ اسپیشل ایجوکیشن اسکول میں ملازم تھا۔زخمی ساجد شادی شدہ اور ایک بچے کا باپ ہے اور نجی ٹیکسٹائل مل میں کام کرتا ہے۔ دونوں افراد ہممدینہ کالونی، قائد آباد کے رہائشی ہیں اور ان کا آبائی تعلق خیرپور میرس سے ہے۔متوفی عامر کی تدفین خیرپور میرس میں کی جائے گی۔ عبدالرحمن نے ٹرالر کے ڈرائیور کے خلاف سخت کارروائی کا مطالبہ کیا ہے۔ پولیس حکام نے اس معاملے کی تفتیش جاری رکھ دی ہے۔