پاکستان کے بغیر ایشیاکپ کا انعقاد ‘ٹاپنگ کے بغیر پیزا’ جیسا ہے، بھارتی کمنٹیٹر
آکاش چوپڑا کا بیان ایشیاکپ کیلئے پی سی بی کے ہائبرڈ ماڈل کو منظوری ملنے کے بعد آیا ہے (فوٹو:ویب)
سابق بھارتی کرکٹر و کمنٹیٹر آکاش چوپڑا کا کہنا ہے کہ پاکستان کے بغیر ایشیاکپ کا انعقاد ‘ٹاپنگ کے بغیر پیزا’ جیسا ہے۔
یوٹیوب چینل پر سابق بھارتی کرکٹر آکاش چوپڑا نے کہا کہ ایشیاکپ کے ہائبرڈ ماڈل منظور ہونے اور ورلڈکپ 2023ء میں پاکستان کے بھارت آکر کھیلنے کے فیصلے پر بلکل حیران نہیں ہوں کیونکہ آئی سی سی ایونٹس کو آپ منع نہیں کرسکتے۔
انہوں نے کہا کہ ورلڈکپ سے قبل پاکستان ایشیاءکپ نہ کھیلنے کا فیصلہ کرسکتا تھا اور دوسری ٹیمیں چاہیں تو گرین شرٹس کے بغیر کھیل لیں لیکن ایشیاءکپ پاکستان کے بغیر ہونا ایسا ہوتا جیسا ‘ٹاپنگ کے بغیر پیزا’، اس ایونٹ کو کوئی نہیں دیکھتا۔
سابق کرکٹر کا بیان ایشیاءکپ کیلئے پی سی بی کے ہائبرڈ ماڈل کو ایشین کرکٹ کونسل (اے سی سی) کی جانب سے باضابطہ منظوری ملنے کے بعد آیا ہے۔
ٹورنامنٹ، جو 31 اگست سے 17 ستمبر کے درمیان کھیلا جائے گا، پاکستان میں 4 میچ کھیلے جائیں گے جبکہ فائنل سمیت 9 میچز سری لنکا میں کھلیں جائیں گے۔ بھارت، پاکستان، سری لنکا، بنگلہ دیش، افغانستان اور نیپال سمیت چھ ٹیمیں کل 13 ون ڈے میچوں میں حصہ لیں گی۔
قبل ازیں بھارتی کرکٹ بورڈ (بی سی سی آئی) نے سیکیورٹی مسائل کا حوالہ دیتے ہوئے ہندوستانی ٹیم کو ٹورنامنٹ کیلئے پاکستان جانے کی اجازت دینے سے انکار کردیا تھا۔
