محمد آصف کی تنقید کے بعد بابراعظم کے والد کا ردعمل بھی آگیا

محمد آصف نے سلمان علی آغا کو کرکٹر ماننے سے ہی انکار کردیا-فوٹو: فائل

“میں آج بھی ٹی 20 کرکٹ میں بابر اعظم کو میڈن اوور کراسکتا ہوں،محمد آصف
پاکستان کے سابق فاسٹ بولر محمد آصف کی جانب سے بابراعظم پر تنقید کے بعد قومی کپتان کے والد کا ردعمل بھی آ گیا۔سابق فاسٹ بولر محمد آصف نے جمعہ کی رات ’ایکس‘ اسپیس سیشن میں بہت سے ایسے بیانات دیئے جو شائقین کرکٹ کے لیے کسی سرپرائز سے کم نہیں تھے۔ محمد آصف نے ورلڈ کپ 2023ء کے لیے گرین شرٹس کے اسکواڈ پر بھی نکتہ چینی کی اور کہا کہ ہمارے اسکواڈ میں تمام اوسط فاسٹ بولرز ہیں، ان میں کوئی بھی خاص نہیں ہے۔محمد آصف نے دعویٰ کیا کہ ’’میں نے بابر اعظم کو زیڈ ٹی بی ایل کے ٹرائلز میں منتخب کرایا تھا، آپ ان کے والد سے پوچھ سکتے ہیں۔ بابراعظم بہترین بلے بازوں میں سے ایک ہیں لیکن وہ بہت زیادہ ڈاٹ باوُلز کھیل کر رضوان پر دباؤ ڈالتے ہیں‘‘۔محمد آصف نے یہ بھی کہا کہ “میں آج بھی ٹی 20 کرکٹ میں بابر اعظم کو میڈن اوور کراسکتا ہوں، اگر آپ بابراعظم کو اچھی گیندیں کرائیں تو وہ شاٹ نہیں لگا سکتے‘‘۔
دوسری جانب بابراعظم کے والد نے محمد آصف کے بیان کے بعد انسٹاگرام پر ایک پوسٹ کی جس میں انکا کہنا تھا کہ بابر کو 16 ہزار 800 روپے جو پہلی تنخواہ ملی تھی اس نے بابر کو آگے بڑھنے میں مدد کی۔ اول تو یہ وقت کبھی نہیں آئے گا اگر آ بھی گیا تو بابر احترام کی وجہ سے ہر صورت آپ (محمد آصف) کا اوور میڈن کھیل جائے گا کیونکہ آپ کی بروقت گواہی ہمارے بڑے کام آئی تھی‘۔آعظم صدیقی کے مطابق ’بابر جب انڈر 16 کا ورلڈ کپ کھیل کر آیا ڈی پی ایس ماڈل ٹاؤن گراؤنڈ کے ساتھ ایک کلب سکول آف کرکٹ ہوا کرتا تھا اُس کلب کے ساتھ بابر کے کلب کا میچ ہوا، دوسری طرف سے اُس وقت محمد آصف کم بیک کی تیاریاں کر رہےتھے، وہ یہ میچ کھیلے، بابر اوپن کرتا تھا محمد آصف نے اٹیک کیا بابر نے اُس میچ میں 84 کیا اور آصف نے ہی اُسے آؤٹ کیا، خیر اننگ ختم ہوئی بابر بڑا دل برداشتہ باہر آیا میرے استفسار پر بتایا کہ آصف بھائی نے بہت بُرا بھلا کہا ہے، میں نے اُس کو تسلی دی اور کہا تم نے بھی تو اُن کو 11 چوکے مارے ہیں خیر بات یہاں ختم ہوگئی‘۔آعظم صدیقی نے مزید بتایا کہ ’محترم منصور رانا نے بابر کو زیڈ ٹی بی ایل کی طرف سے کھیلنے میں مدد کی نیشنل اکیڈمی میں بابر کا ٹرائل ہورہا تھا محمد آصف آئے تو ٹرائل شروع بھی نہیں ہوا تھا، اس وقت بابر نے پیڈ کیے ہوئے تھے دیکھ کر کہا اوئے چھوٹو کدھر؟، بابر نے بتایا آصف بھائی بینک کے ٹرائل ہیں، اُسی وقت وہ بینک انتظامیہ کے پاس گئے اور بڑے سخت لہجے میں کہا اس کا کیا ٹرائل لے رہے ہو اس نے مجھے مارمار کر تھکا دیا تھا، 11 چوک مارے ہیں لکھو اس کا نام اور بینک میں رکھو، یہ تمھارے بڑے کام آئے گا‘۔

آعظم صدیقی نے اپنی پوسٹ میں مزید لکھا کہ ’عوام سے درخواست ہے کہ محمد آصف کے بارے میں کوئی الٹی سیدھی بات نہ کریں‘۔ بعد ازاں آعظم صدیقی نے اپنے انسٹاگرام اکاؤنٹ سے اس پوسٹ کو ڈیلیٹ کردیا ہے۔