افغان بلے باز نے چیمپئنز ٹرافی میں تاریخ رقم کردی

ابراہیم زادران نے 146 گیندوں پر 177 رنز کی شاندار اننگز کھیلی جس میں 12 چوکے اور 6 چھکے شامل تھے

لاہور:(جاگیرنیوز)افغانستان کے اوپنر ابراہیم زادران چیمپئنز ٹرافی میں سب سے زیادہ رنز بنانے والے کھلاڑی بن گئے۔
قذافی اسٹیڈیم لاہور میں گروپ بی کے اہم میچ میں افغانستان نے انگلینڈ کو جیت کیلئے 326 رنز کا ہدف دیا، میچ میں افغانستان نے 50 اوورز میں 7 وکٹوں کے نقصان پر 325 رنز بنائے۔ابراہیم زادران نے 146 گیندوں پر 177 رنز کی شاندار اننگز کھیلی جس میں 12 چوکے اور 6 چھکے شامل تھے۔ابراہم زادران چیمپئنز ٹرافی میں سب سے زیادہ رنز بنانے والے کھلاڑی بن گئے ہیں، انہوں نے ناتھن ایسٹل، بین ڈکٹ، سارو گنگولی اور اینڈی فلاور جیسے لیجنڈ کھلاڑیوں کو بھی پیچھے چھوڑ دیا۔بین ڈکٹ نے رواں چیمپئنز ٹرافی میں آسٹریلیا کیخلاف 165 رنز بنائے تھے، ناتھن ایسٹل نے 2004 میں امریکا کیخلاف 145 رنز ناٹ آؤٹ بنائے تھے۔زمبابوے کے سابق کپتان اینڈی فلاور نے 2002 میں بھارت کیخلاف 145 رنز بنائے تھے جبکہ سابق بھارتی بلے باز سارو گنگولی نے 2000 میں جنوبی افریقا کیخلاف 141 رنز بنائے تھے۔مزید برآں یہ اننگز ابراہیم زادران کا بہترین انفرادی اسکور بھی بن گئی ہے جو اس سے پہلے 162 رنز تھا، انہوں نے یہ اسکور 2022 میں سری لنکا کیخلاف بنایا تھا۔