40 دنوں کے لانگ حج پیکیج کے اخراجات میں 25ہزار کمی
سال 2024ء کے حجاج کرام کوپونے پانچ ارب روپے سے زائد رقم واپس کی جا رہی ہے
اسلام آباد:(جاگیرنیوز) عازمین حج کے لیے خوش خبری، وزیر مذہبی امور چوہدری سالک حسین نے 40 دنوں پر محیط لانگ حج پیکیج کے اخراجات میں 25 ہزار کی کمی کا اعلان کردیا۔
ترجمان وزرات مذہبی امور کے مطابق لانگ جج پیکیج 10 لاکھ 50 ہزار روپے مقرر کیا گیا ہے جبکہ لانگ پیکیج میں تیسری قسط 4 لاکھ 50 ہزار روپے ادا کرنا ہو گی۔اسی طرح 25 دنوں پر محیط شارٹ حج پیکیج 50 ہزار روپے کی مزید کمی کے ساتھ 11 لاکھ روپے مقرر، شارٹ حج پیکیج کی تیسری قسط 5 لاکھ روپے ہو گی، تیسری قسط نامزد بینکوں میں 6 فروری تا 14 فروری جمع کروانا لازم ہے ۔ترجمان نے بتایا کہ ہر عازم حج کو اس کی اطلاع موبائل ایپ ’پاک حج‘ پر مل جائے گی، سال 2024ء کے حجاج کرام کوپونے پانچ ارب روپے سے زائد رقم واپس کی جا رہی ہے ، رقوم کی واپسی کی سات مختلف کیٹگریاں ہیں، رقم میں فرق کی وجہ منیٰ زون، مکہ رہائش ، مکتب سی ہے۔علاوہ ازیں قربانی ریفنڈ اور فضائی کرایوں میں بچت کا فائدہ بھی حجاج کرام کو دیا جا رہا ہے، سال 2024 کے 14 فیصد(9588) حجاج کرام کو 20ہزار روپے بینک اکاؤنٹس میں منتقل کیے جا رہے ہیں، 5 فیصد(3358) حجاج کرام کو 35 ہزار روپے ، 19 فیصد (12981)حجاج کرام کو 50 ہزار روپے، 23 فیصد (16037)حجاج کرام کو 75 ہزار روپے بینک اکاؤنٹس میں منتقل ہوں گے۔دوسری جانب 26 فیصد(17828) حجاج کرام کو 90 ہزار روپے ،10 فیصد(6784) حجاج کرام کو 1 لاکھ 10 ہزار روپے، 3 فیصد(2228) حجاج کرام کو 1 لاکھ 40 ہزار روپے متعلقہ بینک برانچ کے ذریعے واپس ملیں گے۔ترجمان کا مزید کہنا تھا کہ وزارت نامزد بینکوں میں اگلے دو روز میں رقم کی منتقلی شروع کر دے گی ۔
