جمہوریت، صوبائی خودمختاری اور امن کیلئے ہر قربانی دیں گے: ایمل ولی

بانی پی ٹی آئی منتوں پر اتر آیا ہے، جلد پیر پڑنے والا ہے، 9 مئی کا فیصلہ جلد آنے والا ہے اس میں بھی عمران خان کو سزا ہوگی

کرک:(جاگیرنیوز) مرکزی صدر اے این پی سینیٹر ایمل ولی خان نےکہا ہے کہ جمہوریت،صوبائی خودمختاری اور امن کے لئے ہر قربانی دیں گے۔
خیبر پختونخوا کے ضلع کرک میں جلسہ سے خطاب کرتے ہوئے ایمل ولی خان کا کہنا تھا کہ ہر بار عوامی نیشنل پارٹی کا الیکشن میں کبھی آر ٹی ایس تو کبھی بھاری پیسوں کے عوض راستہ روکا جاتا ہے، کے پی کے میں حکومتی رٹ مکمل طور پر ختم ہوچکی ہے۔انہوں نے کہا کہ بانی پی ٹی آئی منتوں پر اتر آیا ہے، جلد پیر پڑنے والا ہے، 9 مئی کا فیصلہ جلد آنے والا ہے اس میں بھی عمران خان کو سزا ہوگی۔
مرکزی صدر اے این پی کا کہنا تھا کہ دہشتگری کا خاتمہ ضروری ہے، ورنہ حالات پھر 2007ء جیسے بنتے جارہے ہیں، حکومت سنجیدگی کا مظاہرہ کرکے نیشنل ایکشن پلان پر سو فیصد عمل درآمد کریں، ہماری لڑائی مذہب کی نہیں بلکہ وسائل اور حقوق کی جنگ ہے۔ایمل ولی خان نے کہا کہ اپنے 3 نکات جمہوریت،صوبائی خودمختاری اور امن کے لئے ہر قربانی دیں گے، ہمیشہ میڈیا کی آزادی کی بات کی ہے، پیکا ایکٹ کی بھر پور مخالفت کی مگر حکومت نے پاس کیا، پیکا ایکٹ میں ترمیم میڈیا کی خودمختاری پر وار ہے۔