راولپنڈی؛ گرفتاری کیلیے چھاپے کے دوران ملزمان کی فائرنگ سے 2 پولیس اہلکار زخمی
دوہرے قتل میں مطلوب اشتہاری فاروق اور اعظم مفرور ہیں، پولیس نے نفری طلب کرکے سرچ آپریشن شروع کردیا
راولپنڈی:(جاگیرنیوز)خطرناک اشتہاریوں کی گرفتاری کے لیے چھاپے کے دوران ملزمان کی فائرنگ سے 2 اہل کار زخمی ہو گئے۔
پولیس کے مطابق راولپنڈی کے علاقے چونترہ میں اشتہاریوں کی گرفتاری کے لیے پولیس نے چھاپا مارا، جس میں ایلیٹ فورس بھی شریک تھی۔ کارروائی کے دوران ملزمان نے پولیس پر فائرنگ کردی، جس میں ایلیٹ فورس کے اے ایس آئی محمد سہیل شدید زخمی جب کہ کانسٹیبل شہباز ریاض زخمی ہو گئے۔ایس ایس پی آپریشن کاشف ذوالفقار نے بتایا کہ اشتہاریوں کے ساتھ مزاحمت میں اہل کار زخمی ہوئے ہیں جب کہ پولیس دوہرے قتل کے خطرناک اشتہاری ملزمان کا تعاقب کررہی ہے۔ملزمان کی جانب سے پولیس پارٹی پر فائرنگ کے بعد بھاری نفری کو طلب کرلیا گیا ہے۔ابتدائی اطلاعات کے مطابق پولیس نے دوہرے قتل کے اشتہاریوں فاروق اور اعظم کی گرفتاری کے لیے چھاپا مارا تھا۔ دونوں ملزمان 2011 سے دوہرے قتل میں مطلوب اور مفرور ہیں۔دوسری جانب زخمی اے ایس آئی محمد سہیل کو ہسپتال منتقل کیا گیا ہے، جہاں ان کا علاج جاری ہے جب کہ ملزمان کی گرفتاری کے لیے علاقے میں سرچنگ کا عمل شروع کردیا گیا ہے۔ حکام کا کہنا ہے کہ شہریوں اور پولیس پر حملہ کرنے والے قانون کی گرفت سے نہیں بچ سکتے۔
