پاکستان اور روس کے درمیان تیل کی خریداری کا طویل المدتی معاہدہ طے پاگیا
پاکستان آئے روسی آئل ٹینکر کی تصویر -فوٹو : فائل
روس سے کمرشل معاہدے کے بعد پہلا آ ئل ٹینکر جہاز دسمبر میں پاکستان پہنچے گا
اسلام آباد: روس سے سستے تیل کی خریداری میں اہم پیش رفت سامنے آگئی، پاکستان اور روس کے مابین تیل کی طویل المدتی خریداری کا معاہدہ طے پاگیا۔ذرائع کے مطابق معاہدہ کمرشل بنیادوں پر ہوا، لوکل ریفائنریز روس سے براہ راست تیل خریدیں گی، ریگولر سپلائی کے بعد گورنمنٹ ٹو گورنمنٹ معاہدہ ہوگا۔وزارت پٹرولیم کے ذرائع کا کہنا ہے کہ روس سے کمرشل معاہدے کے بعد پہلا آ ئل ٹینکر جہاز دسمبر میں پاکستان پہنچے گا، پہلا آ ئل ٹینکر ایک لاکھ میٹرک ٹن خام تیل پر مشتمل ہوگا، روس پاکستان کو پورٹ پر تیل پہنچا کر دے گا۔ذرائع کے مطابق روسی تیل کی قیمت 60 ڈالر فی بیرل ہوگی، اس کمرشل معاہدے میں جی سیون ممالک کی روسی تیل کی قمیت کی حد کو مدنظر رکھا گیا ہے۔ذرائع نے بتایا ہے کہ روسی خام تیل کرایہ اور پریمیم نکال کر بھی عام مارکیٹ سے دس ڈالر فی بیرل سستا ہے، پہلے ٹیسٹ کارگو میں بھی پاکستان کو چار کروڑ ڈالر کی بچت ہوئی۔
