سب کو لیول پلیئنگ فیلڈ ملنی چاہئے، بلے کا نشان کسی اور کو الاٹ نہیں ہوسکتا،گوہر علی

ہمیں عدلیہ پر اعتماد ہے وہ انصاف کرے گی، یہ سب 8 فروری کو 90 فیصد ناکام ہوں گے،رہنما پی ٹی آئی-

اسلام آباد: تحریک انصاف کے رہنما بیرسٹر گوہر علی خان نے کہا کہ سب کو لیول پلیئنگ فیلڈ ملنی چاہئے اورانتخائی نشان الاٹ ہونے چاہئیں۔
تحریک انصاف کے رہنما بیرسٹر گوہر علی خان نے کہا کہ پشاور ہائی کورٹ نے الیکشن ہونے کی وجہ سے ہمیں سٹے دیدیا تھا، الیکشن کمیشن کو ڈائریکشن دی گئی تھی کہ ہمارا انتخابی نشان جاری کیا جائے، پشاور ہائی کورٹ میں 4 گھنٹے کی سماعت ہوئی تھی، عدالت نے یہ مناسب سمجھا کہ آرڈر کو ری کال کرلیں۔بیرسٹر گوہر علی خان نے کہا کہ ہماری ریزرو سیٹ کیلئے سکروٹنی الیکشن کمیشن نے نہیں کی، نشان الاٹ ہونا بڑا ضروری ہے، پارٹی کو علیحدہ کرنا آئین کی خلاف ورزی ہے، یہ لوگوں کے حقوق اور الیکشن کا ایشو ہے، ہمیں امید ہے جمعہ کو سپریم کورٹ ہمارا کیس سنے گی۔پی ٹی آئی کے رہنما نے کہا کہ وہ ملک آگے ترقی نہیں کرسکتا جس کو مضبوط ریاست نہ ملے، پورے ملک کو سیاسی عدم استحکام کاسامنا ہے، الیکشن صاف، شفاف اور غیر جانبدار ہونے چاہئیں، بلے کا نشان کسی اور کو الاٹ نہیں ہوسکتا۔بیرسٹر گوہر علی خان نے کہا کہ بلے کے نشان کے لئے ہم نے سپریم کورٹ میں درخواست دے دی ہے، سپریم کورٹ سے ہماری درخواست ہے جلد سنوائی کی جائے، پلان بی بھی رکھا ہوا ہے، ہماری پہلی کوشش ہے بلا مل جائے، اگر یہ کامیاب ہوگئے تو یہ جمہوریت کے خلاف بہت بڑی سازش ہوگی۔رہنما پی ٹی آئی نے مزید کہا کہ ہمیں عدلیہ پر اعتماد ہے وہ انصاف کرے گی، یہ سب 8 فروری کو 90 فیصد ناکام ہوں گے۔