مسلم لیگ ن نے انتخابی منشور کو حتمی شکل دے دی
لاہور: سینیٹر عرفان صدیقی نے کہا ہے کہ مسلم لیگ(ن) کے انتخابی منشور کو حتمی شکل دے دی گئی، 27 جنوری کو لاہور میں منعقدہ تقریب میں پیش کیا جائے گا۔مسلم لیگ ن رہنما سینیٹر عرفان صدیقی نے کہا ہے کہ پارٹی قیادت سے مشاورت کے بعد مسلم لیگ(ن) کے انتخابی منشور کو حتمی شکل دے دی گئی، ماہرین کی 36 کمیٹیوں کی تجاویز اور اقدامات پر مشتمل جامع منشور کسی بھی جماعت کی طرف سے عوام سے کیا گیا پہلا باضابطہ عہدنامہ ہوگا۔پارٹی ذرائع کے مطابق منشور میں پاکستان کو نواز دو، 9مئی والے نہیں 28مئی والے ہیں، ن لیگ کا بیانیہ ہوگا مسلم لیگ ن کے منشور میں عوام کو ریلیف دینے کے شارٹ ٹرم اور لانگ ٹرم منصوبے شامل ہیں ۔ذرائع کا کہنا ہے کہ منشور میں اقتدار سنبھالنے کے فوری بعد بجلی کے بھاری بلوں میں فوری ریلیف کے منصوبوں کا اعلان متوقع ہے ، منشور میں نوجوانوں کے لئے سب سے زیادہ مراعات دئیے جانے کا امکان ہے، جبکہ نوجوان نسل کو تعلیمی میدان میں ہر ممکن سہولیات فراہم کرنا اور برسر روزگار کرنے کے لئے روزگار کے مواقع پیدا کرنے کے اقدامات بھی منشور کا حصہ ہیں۔
پارٹی ذرائع کے مطابق منشور میں صحت کے حوالے سے اقدامات منشور کا لازمی حصہ ہیں جبکہ مفت علاج کی فراہمی پر خصوصی توجہ رکھی جائے گی ، بیماریوں سے بچاؤ، ماں بچے کی صحت کے پروگرام اور طبی عملے کے لئے مسلسل ری فریشرر کورسز کروائے جائیں گے۔ذرائع کے مطابق نوجوانوں کو ذاتی کاروبار شروع کرنے کے لئے آسان قرضوں کی فراہمی کا منصوبہ بھی منشور کا لازمی حصہ ہے ، خواتین کو معاشی میدان میں خود مختار بنانے کے لئے بھی کئی اقدامات منشور میں شامل ہیں ۔پارٹی ذرائع کے مطابق منشور میں لائیو سٹاک،زراعت کو منشور میں بنیادی حیثیت دی گئی ہے، کسانوں کی ترقی ملک کی ترقی قرار، زراعت میں ہائبرڈ بیج، جدید ترین مشینری و ٹیکنالوجی کا استعمال لانے کے اقدامات کئے جائیں گے۔پارٹی ذرائع کے مطابق آزاد خارجہ پالیسی کو پارٹی منشور میں بنیادی حیثیت حاصل ہو گی، ملکی خودمختاری کو ہر حال میں مقدم رکھا جائے گا ، ہمسایہ ممالک سے اچھے تعلقات قائم کرنا بھی منشور کا حصہ ہے ۔
