سکیورٹی کے باعث کوئی بینک، مارکیٹ، تعلیمی یا نجی ادارہ بند نہیں کرایا گیا: اسلام آباد پولیس

اسلام آباد: اسلام آباد پولیس کی جانب سے کہا گیا ہے کہ وفاقی دار الحکومت میں سکیورٹی کی وجہ سے کوئی تعلیمی ادارہ، مارکیٹ، بینک یا کوئی نجی ادارہ بند نہیں کرایا گیا۔سماجی رابطے کی ویب سائٹ پر اپنے پیغام میں اسلام آباد پولیس کی جانب سے کہا گیا ہے کہ اسلام آباد میں حالات بالکل پُرامن ہیں اور معمولات زندگی رواں دواں ہیں۔اس پر گزشتہ روز آئی سی سی پی او ڈاکٹر اکبر ناصر خاں کی طرف سے ویڈیو پیغام کے ذریعے وضاحت بھی جاری کی جا چکی ہے۔اسلام آباد پولیس نے کہا ہے کہ شہریوں سے گزارش ہے کہ ایسی بے بنیاد افواہوں کو پھیلانے سے گریز کریں، اسلام آباد پولیس شہر میں امن و عامہ کے قیام کے لئے ہمہ وقت مصروف عمل ہے۔