انقلابی شاعر فیض احمد فیض کا 113 واں یوم پیدائش آج منایا جارہا ہے

فیض احمد فیض وہ واحد ایشیائی شاعر تھے جنہیں 1963ء میں لینن پیس ایوارڈ سے نوازا گیا- فوٹوفائل

سیالکوٹ: درجنوں فلموں کے لئے غزلیں، گیت اور مکالمے لکھنے والے انقلابی شاعر فیض احمد فیض کا 113 واں یوم پیدائش آج منایا جارہا ہے۔فیض احمد فیض 13 فروری 1911ء کو شاعر مشرق علامہ اقبال کے شہرسیالکوٹ میں پیدا ہوئے۔ انہوں نے تعلیمی مراحل اپنے آبائی شہر اورلاہورمیں مکمل کیے، اپنے خیالات کی بنیاد پر1936ء میں ادباء کی ترقی پسند تحریک میں شامل ہوئے اوراسے بام عروج پربھی پہنچایا۔دوسری جنگ عظیم میں انہوں نے برطانوی فوج میں شمولیت اختیارکی لیکن بعد میں ایک بار پھرعلم کی روشنی پھیلانے لگے جوزندگی کے آخری روزتک جاری رہی۔فیض کی شاعری کے انگریزی، جرمن، روسی، فرنچ سمیت مختلف زبانوں میں تراجم شائع ہو چکے ہیں، ان کے مجموعہ کلام میں ’’نسخہ ہائے وفا، نقش فریادی، نقش وفا، دست صبا، دست تہہ سنگ، سر وادی سینا، زنداں نامہ‘‘ اور دیگر قابل ذکر ہیں۔وہ واحد ایشیائی شاعر تھے جنہیں 1963ء میں لینن پیس ایوارڈ سے نوازا گیا۔ فیض کی شاعری مجازی مسائل پر ہی محیط نہیں بلکہ انہوں نے حقیقی مسائل کو موضوع بنایا۔فیض کی فلمی انڈسٹری کے لیے خدمات بھی ناقابل فراموش ہیں ان کا کلام محمد رفیع، ملکہ ترنم نور جہاں، مہدی حسن، آشا بھوسلے اورجگجیت سنگھ جیسے گلوکاروں کی آوازوں میں ریکارڈ کیا گیا جب کہ انہوں نے درجنوں فلموں کے لئے غزلیں، گیت اورمکالمے بھی لکھے۔وہ 20 نومبر 1984ء کو 73 برس کی عمر میں اپنے خالق حقیقی سے جاملے۔