شاہین قومی ٹیم کا فٹنس کیمپ چھوڑ کر پشاور چلے گئے

فاسٹ بولر اجازت لیکر کیمپ سے روانہ ہوئے،بورڈ حکام -فوٹو: پی سی بی

شاہین آفریدی پیر کوراولپنڈی میں شیڈول خصوصی ٹیم افطار ڈنر میں شریک ہوں گے
سابق کپتان شاہین شاہ آفریدی کاکول میں جاری قومی ٹیم کا فٹنس کیمپ چھوڑ کر پشاور چلے گئے۔
ذرائع کے مطابق کپتانی سے ہٹائے جانے پر ناخوش شاہین شاہ آفریدی گزشتہ روز کیمپ سے اپنے گھر روانہ ہوگئے تھے۔شاہین شاہ آفریدی کی سوشل میڈیا پلیٹ فارم پر ایک ویڈیو بھی وائرل ہوئی ہے جس میں علامتی طورپر شیئر کو دکھایا گیا اور اس پر درج عبارت کو شاہین شاہ آفریدی کے جذبات سے تعبیر کیا جارہا ہے۔فاسٹ بولر آج اپنی 24ویں سالگرہ منارہے ہیں، ان کے کیمپ چھوڑ کر جانے کے حوالے سے پی سی بی حکام نے شاہین کے ناراض ہوکر کیمپ سے جانے کے تاثر کو مسترد کرتے ہوئے مؤقف اپنادیاہے کہ وہ باقاعدہ اجازت لےکر کیمپ سے گئے ہیں۔شاہین آفریدی پیر کو پنڈی میں شیڈول خصوصی ٹیم افطار ڈنر میں شریک ہوں گے۔
واضح رہے کہ سابق چیئرمین ذکاء اشرف نے شاہین شاہ آفریدی کوٹی20 ٹیم کا کپتان مقرر کیا تھا تاہم موجودہ چیئرمین محسن نقوی نے ان کی جگہ دوبارہ بابراعظم کو قیادت سونپ دی ہے جس پر قیاس آرائیاں کی جارہی ہیں کہ فاسٹ بولر ناراض ہیں۔