چین میں سکول بس بچوں پر چڑھ دوڑی،11 طلبا ہلاک

چین میں سکول بس نے قطار بناکر مرکزی دروازے سے داخل ہونے والے طلباء کو کچل دیا-

بیجنگ: چین میں سکول کے دروازے پر کھڑے بچوں کو ان کی بس نے کچل دیا۔
عالمی خبر رساں ادارے کے مطابق یہ افسوسناک واقعہ چین کے صوبے شینڈونگ کے شہر تائی آن میں صبح 7 بجے اُس وقت پیش آیا جب بچے قطار بناکر مرکزی دروازے سے سکول میں داخل ہو رہے تھے۔اس دوارن ایک تیز رفتار سکول بس نے درجن کے قریب بچوں کو کچل دیا۔ بچوں کو ہسپتال منتقل کردیا گیا جہاں 11 ہلاکتوں کی تصدیق کردی گئی جب کہ زخمیوں کی تعداد کے حوالے سے متضاد اطلاعات ہیں۔سوشل میڈیا پر وائرل ہونے والی تصاویر میں دیکھا جا سکتا ہے کہ ایک بس کے قریب سڑک پر خون میں لتھڑے ہوئے یونی فارم میں ملبوس بچوں کی کچلی ہوئی لاشیں بکھری پڑی ہیں اور والدین ان کے نزدیک بیٹھے رو رہے ہیں۔یاد رہے کہ چین میں کئی سرکاری سکول اس ہفتے نئے تعلیمی سال کے لیے دوبارہ کھلے ہیں جہاں بے ہنگم ٹریفک اور حفاظتی تدابیر اختیار نہ کرنے باعث جان لیوا حادثات ہوتے رہتے ہیں۔دو ماہ قبل ہی چین کے وسطی شہر چانگشا میں ایک گاڑی نے پیدل چلنے والوں کو کچل دیا تھا جس میں 8 افراد ہلاک اور 5 زخمی ہوگئے تھے۔