جنوبی سوڈان میں مسافر طیارہ گرکر تباہ، 20 مسافر ہلاک

طیارہ شمالی ریاست میں ایک آئل فیلڈ سے پٹرولیم کمپنیوں کے ملازمین کو لے کر دارالحکومت جوبا روانہ ہوا تھا

جوبا: (جاگیر نیوز) جنوبی سوڈان کی یونٹی سٹیٹ میں مسافر بردار چھوٹا طیارہ نامعلوم وجوہات کے باعث گر کر تباہ ہوگیا۔
عالمی خبر رساں ادارے کے مطابق طیارہ شمالی ریاست میں ایک آئل فیلڈ سے پٹرولیم کمپنیوں کے ملازمین کو لے کر دارالحکومت جوبا روانہ ہوا تھا۔وزیر اطلاعات نے بتایا کہ طیارہ یونٹی آئل فیلڈ کے ہوائی اڈے پر گر کر تباہ ہوگیا۔، جس میں چائنا نیشنل پٹرولیم کارپوریشن اور سرکاری نیل پٹرولیم کارپوریشن کے ملازمین سوار تھے۔امدادی کاموں کے دوران 18 لاشیں نکالی گئیں جبکہ 3 افراد کو شدید زخمی حالت میں ہسپتال منتقل کیا جہاں دو زخمیوں نے دورانِ علاج دم توڑ دیا۔ہلاک ہونے والوں میں 2 چینی شہری اور ایک بھارتی باشندہ بھی شامل ہے، صرف ایک مسافر زندہ بچا جس کی حالت تاحال تشویشناک ہے، حادثے کی وجوہات کا تعین نہیں کیا جا سکا ہے، تحقیقات کے لیے انکوائری کمیٹی تشکیل دیدی گئی۔