پاک نیوی کی زیر نگرانی مشق سی گارڈ25 کی کراچی میں افتتاحی تقریب
یہ مشق اپنی نوعیت کی ایک اہم کاوش ہے،اس کا مقصد پاکستان کے مختلف بحری شعبوں کو ایک مشترکہ پلیٹ فارم پر لانا ہے
راولپنڈی :(جاگیرنیوز) پاکستان نیوی کی زیر نگرانی مشق سی گارڈ-25 کی افتتاحی تقریب منعقد کی گئی۔
افتتاحی تقریب میں کمانڈر کوسٹ، ریئر ایڈمرل فیصل امین نے بطور مہمان خصوصی شرکت کی۔پاک فوج کے شعبہ تعلقات عامہ (آئی ایس پی آر) کے مطابق یہ مشق اپنی نوعیت کی دوسری بڑی مشق ہے، جوپاکستان نیوی کی ایک اہم کاوش ہے،اس کا مقصد پاکستان کے مختلف بحری شعبوں کو ایک مشترکہ پلیٹ فارم پر لانا ہے، جن میں شپنگ، ماہی گیری، قانون نافذ کرنے والے ادارے، نجی کمپنیاں اور این جی اوز شامل ہیں، تاکہ بحری شعبے کو درپیش چیلنجز کا مشترکہ حل نکالا جا سکے۔مشق کی افتتاحی بریفنگ میں پاکستان میری ٹائم سکیورٹی ایجنسی، پاکستان کوسٹ گارڈز، پاکستان نیشنل شپنگ کارپوریشن، اینٹی نارکوٹکس فورس، ایف آئی اے، کراچی پورٹ ٹرسٹ، اور پورٹ قاسم اتھارٹی سمیت مختلف اداروں کے نمائندے موجود تھے۔ترجمان پاک فوج کا کہنا تھا کہ اس موقع پر شرکاء کو مشق سی گارڈ کے اغراض و مقاصد اور جوائنٹ میری ٹائم انفارمیشن کوآرڈینیشن سینٹر (JMICC) کے کلیدی کردار سے آگاہ کیا گیا، جو پاکستان کے ساحلی علاقوں میں بحری تحفظ اور سکیورٹی کو یقینی بنانے کے لیے کام کر رہا ہے۔آئی ایس پی آر کے مطابق یہ مشق قومی سطح پر متعلقہ اداروں کے درمیان ہم آہنگی کو فروغ دینے اور پاکستانی سمندری حدود کے تحفظ کو مزید مؤثر بنانے کے لیے ترتیب دی گئی ہے، اس دوران سمندری مشقوں، عملی سرگرمیوں اور ٹیبل ٹاپ ڈسکشنز کے ذریعے موجودہ سیکیورٹی نظام کو مزید بہتر بنایا جائے گا۔ترجمان پاک فوج نے مزید بتایا کہ تقریب کے آخر میں کمانڈر کوسٹ ریئر ایڈمرل فیصل امین نے تمام قومی اداروں کا شکریہ ادا کیا اور بحری تحفظ کے لیے ان کی کوششوں کو سراہا ہےاور اس بات پر زور دیا کہ تمام اسٹیک ہولڈرز کے باہمی تعاون سے پاکستان کی بحری سرحدوں کو مزید محفوظ بنایا جا سکتا ہے۔
