لوئر جنوبی وزیرستان: مسجد میں دھماکہ ، متعدد افراد زخمی

دھماکے میں جمعیت علمائے اسلام جنوبی وزیرستان لوئر کے ضلعی امیر مولانا عبداللہ ندیم کو نشانہ بنایا گیا ہے

جنوبی وزیرستان: (جاگیر نیوز) لوئر جنوبی وزیرستان کے علاقے اعظم ورسک بازار کی مسجد میں دھماکہ ہو گیا جس کے باعث متعدد افراد کے زخمی ہونے کی اطلاعات ہیں۔
پولیس ذرائع کے مطابق دھماکہ نماز جمعہ کےد وران مسجد میں ہوا، دھماکے میں جمعیت علمائے اسلام کےضلعی امیر مولانا عبداللہ ندیم بھی زخمی ہو ئے ہیں۔واقعہ کی اطلاع ملتے ہی ریسکیو ٹیمیں اور سکیورٹی فورسز موقع پر پہنچ گئیں، ریسکیو ٹیموں کی جانب سے زخمیوں کو ہسپتال منتقل کیا جارہا ہے جبکہ سکیورٹی فورسز نےعلاقے کو گھیرے میں لے لیا ہے۔اس حوالے سے ڈی پی او آصف بہادر نے کہا ہے کہ دھماکہ لوئر وزیرستان کے علاقے اعظم ورسک میں مولانا عبدالعزیز مسجد کے اندر ہوا ہے، مسجد کے محراب کے پاس ریموٹ کنٹرول بم رکھا گیا تھا، دھماکہ نماز سے تھوڑی دیر پہلے ہوا ہے ، دھماکے میں جمعیت علمائے اسلام جنوبی وزیرستان لوئر کے ضلعی امیر مولانا عبداللہ ندیم کو نشانہ بنایا گیا ہے۔انہوں نے مزید بتایا کہ مولانا عبداللہ ندیم سمیت اب تک چار افراد زخمی لائے گئے ہیں، دھماکے کے بعد امدادی کارروائیاں جاری ہیں، زخمیوں کو ڈسٹرکٹ ہیڈکوارٹر ہسپتال وانا منتقل کیا جا رہا ہے۔