ایک ہفتے میں 12 اشیاء مہنگی، 15 سستی، 24 کی قیمتیں مستحکم
ایک ہفتے میں مہنگائی کی شرح میں 0 اعشاریہ 22 اضافہ ہوا،سالانہ بنیادوں پر مہنگائی بڑھنے کی شرح منفی 1.97 فیصد رہی
اسلام آباد: (جاگیرنیوز) ملک میں رواں ہفتے کے دوران مہنگائی کی شرح میں معمولی اضافہ ریکارڈ کیا گیا ہے، ادارہ شماریات نے ہفتہ وار بنیادوں پر مہنگائی کے اعدادوشمار جاری کردیئے۔
ادارہ شماریات کے تازہ اعدادوشمار کے مطابق ایک ہفتے میں مہنگائی کی شرح میں 0 اعشاریہ 22 اضافہ ہوا ہے جبکہ ملک میں سالانہ بنیادوں پر مہنگائی بڑھنے کی شرح منفی 1.97 فیصد ریکارڈ کی گئی ہے۔رپورٹ کے مطابق ایک ہفتے میں 12 اشیاء ضروریہ کی قیمتوں میں اضافہ ہوا، 15 اشیاء کی قیمتوں میں کمی جبکہ 24 کی قیمتیں مستحکم رہیں۔ایک ہفتے میں ٹماٹر کی فی کلو قیمت میں 22 روپے تک اضافہ ہوا جبکہ زندہ مرغی کی فی کلو قیمت 31 روپے تک بڑھ کر 510 روپے تک پہنچ گئی، ایک ہفتے میں چینی کی فی کلو قیمت میں 9 روپے تک اضافہ ہوا۔ادارہ شماریات کی رپورٹ میں بتایا گیا کہ ایک ہفتے میں ایل پی جی کا گھریلو سلنڈر 46 روپے تک مہنگا ہوا، گوشت، کیلے، گڑ، دال مونگ اور خشک دودھ مہنگی ہونے والی اشیاء میں شامل ہیں۔رپورٹ کے مطابق ایک ہفتے میں پیاز کی فی کلو قیمت میں 14 روپے تک کمی ہوئی، آلو پانچ روپے اور لہسن 36 روپے فی کلو سستا ہوا، ایک ہفتے میں دال چنا 6 روپے جبکہ دال ماش 2 روپے فی کلو تک سستی ہوئی، دال مسور، چاول، خوردنی تیل اور گھی سستی ہونے والی اشیاء میں شامل ہیں۔
