بھارت نےحریت رہنما میر واعظ عمر فاروق کو 4 سال بعد رہا کر دیا

حریت رہنما کو مقبوضہ کشمیر کی آ ئینی خود مختاری کو منسوخی وقت حراست میں لیاتھا-فوٹو: رائٹرز

ہندو قوم پرست حکومت کی جانب سے مقبوضہ کشمیر کی آ ئینی تبدیلی “ناقابل قبول ہے،میرواعظ
سری نگر: بھارتی حکومت نےحریت رہنما میر واعظ عمر فاروق کو چار سال سے زائد گھر میں نظربند رکھنے کے بعد رہا کر دیا۔
عالمی میڈیا کے مطابق 50 سالہ حریت رہنما میر واعظ عمر فاروق کو دیگر سیاسی رہنماؤں اور ہزاروں رہائشیوں کے ساتھ اس وقت حراست میں لیا گیا تھا جب حکومت نے مقبوضہ کشمیر کی آ ئینی خود مختاری کو منسوخ کردی تھی۔زیادہ تر نظربندوں کو بعد میں رہا کر دیا گیا لیکن میر واعظ سری نگر میں اپنی جامع مسجد سے منسلک گلی میں واقع رہائش گاہ سے نکلنے سے قاصر رہے۔ 218 ہفتوں میں پہلی بار انہیں نماز جمعہ کی امامت کرتے ہوئے دیکھنے کے لیے ہزاروں نمازی جمع ہوئے۔گزشتہ ہفتے ایک عدالت نے بھارتی حکام سے حراست کے معاملے میں وضاحت طلب کی تھی۔ بعدازاں مقبوضہ کشمیر کی پولیس نے انہیں مطلع کیا کہ حکام نے انہیٰں رہا کرنے کا فیصلہ کیا ہے۔انہوں نے جمعہ کے خطاب میں کہا کہ ’’میری نظر بندی اور اپنے لوگوں سے علیحدگی کا یہ دور میرے لیے میرے والد کی موت کے بعد سب سے زیادہ تکلیف دہ رہا ہے۔میرواعظ نے وزیر اعظم نریندر مودی کی ہندو قوم پرست حکومت کی جانب سے مقبوضہ کشمیر کی آ ئینی تبدیلیوں کو “ناقابل قبول” قرار دیتے ہوئے کہا ’’آپ کو لگتا ہے کہ ہمارے جذبے کمزور ہیں، بالکل نہیں، ہمارا جذبہ بلند ہے‘‘