چیمپئنز ٹرافی 2025 ء، ورلڈ کپ 2023ء کی ٹاپ سات ٹیمیں کوالیفائی کریں
پاکستان میزبان کی حیثیت سے ٹورنامنٹ میں شامل ہوگا۔فوٹو: فائل
انٹرنیشنل کرکٹ کونسل نے چیمپئنز ٹرافی 2025ء کے لیے کوالیفیکیشن کے طریقہ کار کا اعلان کردیا۔
کرکٹ کی معروف ویب سائٹ ای ایس پی این کرک انفو کے مطابق آئی سی سی ترجمان نے اس بات کی تصدیق کی ہے کہ پاکستان کی میزبانی میں ہونے والی چیمپئنز ٹرافی 2025ء میں ورلڈ کپ 2023ء کی ٹاپ سات ٹیمیں کوالیفائی کریں گی جبکہ پاکستان میزبان کی حیثیت سے ٹورنامنٹ میں شامل ہوگا۔آئی سی سی ترجمان کا کہنا ہے کہ چیمپئنز ٹرافی 2025ء کے لیے اہلیت کے نظام کی 2021 ءمیں آئی سی سی بورڈ نے منظوری دی تھی۔ اس پیشرفت کے بعد زمبابوے، آئرلینڈ اور ویسٹ انڈیز جیسی ٹیمیں جو ورلڈ کپ 2023ء میں کوالیفائی نہیں کرسکی تھیں وہ چیمپئنز ٹرافی 2025 بھی نہیں کھیل سکیں گی۔واضح رہے کہ یہ پیشرفت اُن ٹیموں کیلئے بھی حیران کن ہے جو 2025ء کی چیمپئنز ٹرافی کے لیے کوالیفائی کرنے کے بارے میں لاعلم تھیں۔ ہفتہ کو ورلڈ کپ میں نیدرلینڈز سے شکست کھانے کے بعد بنگلادیش کے کپتان شکیب الحسن نے کہا کہ اگرچہ ہم ورلڈ کپ میں سیمی فائنل کی دوڑ سے باہر ہیں لیکن ہم اپنے باقی تین میچز جیت چیمپئنز ٹرافی میں جگہ پکی کرنے کی کوشش کریں گے۔یہ بات قابل ذکر ہے کہ نومبر 2021ء میں آئی سی سی نے 31-2024ء سائیکل میں مردوں اور خواتین کے لیے متعدد عالمی کرکٹ ایونٹس کا اعلان کیا تھا جس میں چیمپئنز ٹرافی کے دو ایڈیشن 2025ء اور 2029ء بھی شامل ہیں۔ چیمپئنز ٹرافی کے پچھلے دو ایڈیشن 2013ء اور 2017ء بالترتیب بھارت اور پاکستان نے جیتے تھے۔ذرائع کے مطابق آئی سی سی کے ایک فل ممبر بورڈ نے اس بات کی بھی تصدیق کی ہے کہ 2027ء کا ورلڈ کپ 14 ٹیموں کا ٹورنامنٹ ہو گا جس کی میزبانی جنوبی افریقا، نمیبیا اور زمبابوے کریں گے جہاں کوالیفکیشن کا منظر نامہ یہ ہے کہ آئی سی سی رینکنگ میں ٹاپ ایٹ کی ٹیمیں کوالیفائی کریں گی۔ چار ٹیمیں کوالیفائر ٹورنامنٹ کھیلنے کے بعد اپنا راستہ بنائیں گی جبکہ زمبابوے اور جنوبی افریقہ میزبان کے طور پر کوالیفائی کریں گے۔
