ویرات کوہلی نے سچن ٹنڈولکر کا تاریخی ریکارڈ توڑ دیا

کوہلی نے ٹنڈولکر کے ورلڈکپ کے ایک ایڈیشن میں بنائے گئے رنز کا بھی ریکارڈ بھی توڑ دیا-فوٹو: فائل

نئی دہلی: ویرات کوہلی نے آج آئی سی سی ورلڈ کپ 2023ء کے سیمی فائنل میں نیوزی لینڈ کے خلاف 117 رنز بناکر اپنے ایک روزہ میچوں کی 50 ویں سنچری بنا ڈالی اور اپنے ہی ملک کے شہرۂ آفاق بلے باز سچن ٹنڈولکر کا سب سے زیادہ ون ڈے سنچریوں کا تاریخی ریکارڈ توڑ دیا۔ویرات کوہلی نے سنچریوں کی نصف سینچری کا سنگ میل 42ویں اوور میں نیوزی لینڈ کے باؤلر لوکی فرگوسن کی گیند پر عبور کیا اور ہوا میں اچھل کر جشن منایا۔ویرات کوہلی نے اسٹیڈیم میں بیٹھے سچن ٹنڈولکر کی جانب اشارہ کرکے انھیں خراج تحسین بھی پیش کیا اور پھر اپنی اہلیہ اداکارہ انوشکا کی جانب پیار کا اظہار کیا۔

اس تاریخی موقع پر پورا اسٹیڈیم تالیوں سے گونجتا رہا۔دائیں ہاتھ سے بلے بازی کرنے والے ویرات کوہلی کی یہ سنچری ورلڈکپس میں مجموعی طور پر 5 ویں جب کہ ورلڈ کپ 2023ء میں تیسری سنچری ہے۔ آج نیوزی لینڈ سے قبل وہ بنگلا دیش اور جنوبی افریقا کے خلاف سنچریاں بنا چکے ہیں۔ویرات کوہلی کی ورلڈکپ میں مجموعی طور پر بنائی گئی سنچریوں کی خاص بات یہ بھی رہی ہے کہ پانچ میں سے چار سینچریوں نے بھارت کی جیت میں کلیدی کردار ادا کیا۔

بھارتی بلے باز ویرات کوہلی کے لیے آج دن یوں بھی خاص رہا کہ انھوں نے بھارت کی جانب سے ورلڈکپ کے ایک ایڈیشن میں سب سے زیادہ رنز بنانے کے سچن ٹنڈولکر کے ریکارڈ کو بھی توڑ دیا۔کرکٹ ورلڈ کپ میں ویرات نے اس ایڈیشن کے 10 اننگز میں 101.57 کی اوسط سے 711 رنز بنائے ہیں۔یاد رہے کہ ویرات کوہلی کوہلی نے 2008ء میں اپنے بین الاقوامی کیریئر کا آغاز کیا تھا اور پہلی ون ڈے سنچری دسمبر 2009ء میں سری لنکا کے خلاف بنائی تھی۔

35 ویرات کوہلی 290 ایک روزہ میچوں میں 13 ہزار 700 سے زائد رنز بنا چکے ہیں اور 187 ٹیسٹ اننگز میں انھوں نے 8676 رنز سمیٹے جب کہ 115 ٹی-20 میچوں میں کوہلی کے بلّے نے 4008 رنز اگلے۔