تھر ٹرانسمیشن لائن مکمل، بجلی قیمت بڑھنے کا امکان نہیں، خرم دستگیر
رواں ماہ وزیر اعظم جیونی ٹرانسمیشن کا افتتاح کرینگے، واپڈا ہاؤس میں پریس کانفرنس (فوٹو: فائل)
لاہور: (ویب نیوز)وفاقی وزیر توانائی انجینئر خرم دستگیر نے کہا ہے کہ آئندہ ملک میں امپور ٹڈ وسائل سے بجلی پیدا نہیں کی جائے گی، موجودہ حکومت نے ایک سال کے دوران سسٹم میں 3ہزار میگاواٹ بجلی شامل کی ہے، رواں ماہ کے دوران وزیر اعظم جیونی ٹرانسمیشن لائن کا افتتاح کریں گے
وفاقی وزیر توانائی انجینئر خرم دستگیر نے کہا ہے کہ بجلی کی قیمتوں میں آنیوالے مہینوں میں اضافے کا کوئی امکان نہیں، 220 کلو میٹر پر محیط 15ارب روپے کی لاگت سے تھر مٹیاری ٹرانسمیشن لائن مکمل کر لی ہے،
خرم دستگیر نے ان خیالات کا اظہار واپڈا ہاؤس لاہور میں منیجنگ ڈائریکٹر این ٹی ڈی سی انجینئر ڈاکٹر عبدالجبار خان کے ہمراہ پریس کانفرنس میں کیا۔وزیر توانائی نے کہا عوام کو سستی بجلی فراہم کرنا ہماری ترجیحات میں شامل ہے،موجودہ حکومت کوشش کر رہی ہے عوام پر کم بوجھ ڈالا جائے۔بجلی کی طلب کو پورا کرنے کے لیے15ارب روپے کی لاگت سے تھر مٹیاری ٹرانسمیشن لائن ریکارڈ مدت میں مکمل کی،منصوبہ کو مکمل کرنے کے لیے شہباز شریف نے خصوصی ہدایت کی تھی۔
