عثمان وزیر نے تھائی حریف کو شکست دیکر انٹرنیشنل رینکنگ فائٹ جیت لی

عثمان وزیر نے اپنی فتح فلسطین کے مظلوم مسلمانوں کے نام کر دی-

بینکاک: پاکستانی باکسر عثمان وزیر نے اپنی انٹر نیشنل رینکنگ فائٹ جیت لی۔
ڈبلیو بی او یوتھ ورلڈ چیمپئن عثمان وزیر نے تھائی لینڈ کے حریف کو اس کے ہوم گراؤنڈ پر شکست دے کر تاریخ رقم کر دی، عثمان وزیر کے جارحانہ انداز کے سامنے تھائی باکسر بے بس، تیسرے راونڈ میں ناک آوٹ ہوگئے۔عثمان وزیر نے اپنی 12ویں انٹر نیشنل فائٹ میں بھی ناقابل شکست رہنے کا اعزاز برقرار رکھا، عثمان وزیر نے اپنی فتح فلسطین کے مظلوم مسلمانوں کے نام کر دی۔اس موقع پر عثمان وزیر نے گفتگو کرتے ہوئے کہا کہ اہم فائٹ میں میری کامیابی کے لئے دعاؤں پر پاکستانیوں کا شکریہ، مستقبل میں بھی باکسنگ کے میدان میں پاکستان کا پرچم سربلند رکھنے کے لئے پر عزم ہوں۔پاکستانی باکسنگ سٹار کو سپورٹ کرنے کیلئے وہاں موجود تھائی لینڈ میں تعینات پاکستانی سفیر یاسر حسین نے کہا کہ عثمان وزیر نے فائٹ جیت کر تھائی لینڈ میں موجود پاکستانیوں کے سر فخر سے بلند کر دیئے۔