اسٹیل ملز کی 1500 ایکڑ زمین صنعتی پارک کیلئے مختص کردی گئی، گوہراعجاز
اراضی چین کو دیں گے، کراچی میں مزید صنعتی پارکس ضروری، گوہر اعجاز کی مقبول باقر سے گفتگو- فوٹو : فائل
صنعت کاری ہی معیشت کو ترقی دینے اور روزگار کے مواقع پیدا کرنے کا واحد حل ہے
کراچی(این این آئی) نگران وفاقی وزیر تجارت گوہر اعجاز نے کہا ہے کہ اسٹیل ملزکی 1500 ایکڑ زمین انڈسٹریل پارک کیلئے مختص کی گئی ہے اور اس کی ترقی سی پیک کے تحت چینی حکام کو تفویض کی گئی تھی۔سرکاری اعلامیے کے مطابق نگران وزیراعلیٰ سندھ جسٹس (ر) مقبول باقر اور گوہر اعجاز کے درمیان وزیراعلیٰ ہائوس میں ملاقات ہوئی جس میں کراچی میں مزید صنعتی پارکس کے قیام کی ضرورت پر تبادلہ خیال کیا گیا۔گوہر اعجاز نے کہا وفاقی حکومت نے اپنے صنعتی یونٹس قائم کرنے کیلئے اسے چینی حکام کے حوالے کرنے کا منصوبہ تیار کر لیا ہے۔وزیر اعلیٰ نے کہا کہ صنعت کاری ہی معیشت کو ترقی دینے اور روزگار کے مواقع پیدا کرنے کا واحد حل ہے اور یقینا اس سے خوشحالی و ترقی کے نئے راستے کھلتے ہیں۔
