غزہ میں اسرائیلی فوج کی بمباری سے مزید 132 فلسطینی شہید
غزہ: اسرائیلی فوج کی جانب سے غزہ میں فلسطینیوں کا قتل عام جاری ہے۔
عرب میڈیا کے مطابق صیہونی فورسز کی جانب سے رفاہ کے ہسپتالوں، سکول اور گھروں پر تازہ حملوں میں 2 خاندانوں کے 11 افراد سمیت 25 فلسطینی شہید ہوگئے، 24 گھنٹوں میں 132 فلسطینی اسرائیلی دہشتگردی کا نشانہ بنے۔صیہونی افواج کے معراج اور خان یونس میں بھی حملے جاری ہیں جس کے باعث شہادتوں میں اضافے کا خدشہ ہے۔واضح رہے کہ 7 اکتوبر سے غزہ پر اسرائیلی حملوں میں کم از کم 24 ہزار 100 افراد شہید اور 60 ہزار 800 سے زائد زخمی ہو چکے ہیں۔ادھر عرب میڈیا کے مطابق اسرائیلی فوج نے گزشتہ روز مقبوضہ مغربی کنارے میں چھاپہ مار کارروائی کی، صیہونی فورسز نے حماس کے شہید رہنما صالح العاروری کی دو بہنوں 52 سالہ دلال العاروری اور 47 سالہ فاطمہ العاروری کو حراست میں لیا۔شہید صالح العاروری کے بہنوئی نے بتایا کہ اسرائیلی حکام نے ریاست کے خلاف دہشتگردی میں ملوث ہونے کا الزام عائد کر کے فیملی کی دو خواتین سمیت دیگر افراد کو حراست میں لیا ہے۔
