چھاتی کے کینسر سے شفایاب افراد میں دوبارہ کینسر کا خطرہ ہوتا ہے، تحقیق

چھاتی کے کینسر سے بچنے والوں میں دوسرے کینسر کے خطرے کے حوالے سے یہ اب تک کی سب سے بڑی تحقیق ہے، اینتونس انتونیو ن-فائل:فوٹو

کیمبرج: ایک نئی تحقیق سے پتہ چلا ہے کہ چھاتی کے کینسر سے شفایاب ہو جانے والے افراد میں دوسرے کینسر کا خطرہ زیادہ بڑھ جاتا ہے۔
میڈیا رپورٹس کے مطابق برطانوی محققین نے اپنے حالیہ مطالعے میں اس بات کا انکشاف کیا کہ اگرچہ کسی بھی بریسٹ کینسر سے شفایاب ہوئے شخص میں دوسرے کینسر کا خطرہ بہت کم ہوتا ہے لیکن یہ ان لوگوں کے مقابلے میں تب بھی زیادہ ہے جنہیں کبھی چھاتی کا کینسر نہیں ہوا۔برطانیہ کی کیمبرج یونیورسٹی کے محقق اور مطالعے کے سینئر مصنف اینتونس انتونیو نے کہا کہ چھاتی کے کینسر سے بچ جانے والوں میں دوسرے کینسر کے خطرے کے حوالے سے یہ اب تک کی سب سے بڑی تحقیق ہے۔انتونیس اور ان کی ٹیم نے چھاتی کے کینسر سے بچ جانے والے 580,000 سے زائد خواتین اور 3,500 سے زائد مردوں کے اعداد و شمار کو دیکھا جن میں 1995ء اور 2019ء کے درمیان چھاتی کے کینسر کی ابتدائی تشخیص ہوئی تھی۔محققین نے پایا کہ چھاتی کے کینسر سے بچ جانے والی تمام خواتین میں دوسری چھاتی میں ٹیومر پیدا ہونے کا خطرہ ان خواتین کے مقابلے میں دوگنا تھا جنہیں پہلے کبھی چھاتی کا کینسر نہیں ہوا جب کہ شفایاب ہونے والے والے مردوں میں دوبارہ کینسر کا خطرہ 55 فیصد زیادہ تھا۔