سعودی عرب کے بنیادی شہری ڈھانچے کو نشانہ بنانا انتہائی قابل مذمت اقدام ہے، ترجمان دفتر خارجہ
یہ حملے سعودی عرب کی خودمختاری اور علاقائی سالمیت کی کھلی خلاف ورزی ہیں اور خطے کے امن، سلامتی اور استحکام کے لیے سنگین خطرہ ہیں،پاکستان خطے میں امن اور استحکام کے حصول کے لیے اپنی مخلصانہ کوششیں جاری رکھے گا،ترجمان دفتر خارجہ
ڈپلومیٹ رپورٹر: عبدالمالک
اسلام آباد: (جاگیر نیوز)پاکستان نے سعودی عرب کے ریاض اور مدینہ کے علاقوں میں ڈرون حملوں کے ذریعے ایسٹ ویسٹ پائپ لائن کو نشانہ بنانے کی شدید مذمت کی ہے۔
پاکستان نے سعودی عرب کی ایسٹ ویسٹ پائپ لائن پر ہونے والے ڈرون حملوں کی شدید مذمت کرتے ہوئے کہا ہے کہ شہری بنیادی ڈھانچے کو نشانہ بنانا بین الاقوامی قانون کی صریح خلاف ورزی اور سعودی خودمختاری و علاقائی سالمیت کی کھلی خلاف ورزی ہے۔
ترجمان دفتر خارجہ کے مطابق بنیادی شہری ڈھانچے کو نشانہ بنانا انتہائی قابل مذمت اقدام ہے۔ ان حملوں کے نتیجے میں پائپ لائن کو نقصان پہنچا جبکہ بعض شہری بھی زخمی ہوئے، پاکستان ان حملوں اور شہری بنیادی ڈھانچے کو نشانہ بنانے کی شدید مذمت کرتا ہے۔دفتر خارجہ نے کہا کہ یہ حملے سعودی عرب کی خودمختاری اور علاقائی سالمیت کی کھلی خلاف ورزی ہیں اور خطے کے امن، سلامتی اور استحکام کے لیے سنگین خطرہ ہیں۔پاکستان نے سعودی عرب کی خودمختاری اور علاقائی سالمیت کے لیے اپنی غیر متزلزل حمایت کا اعادہ کرتے ہوئے سعودی قیادت، حکومت اور برادر عوام کے ساتھ مکمل یکجہتی کا اظہار کیا ہے۔دفتر خارجہ کے مطابق پاکستان خطے میں امن اور استحکام کے حصول کے لیے اپنی مخلصانہ کوششیں جاری رکھے گا۔
