پروفیشنل باؤٹ میں شرکت کو پاکستان کی قومی نمائندگی قرار نہ دیا جائے، پی بی ایف

قومی ٹیم میں شمولیت کارکردگی، مقابلے اور باضابطہ انتخاب سے مشروط ہے، نجی مقابلوں میں باکسر ذاتی یا تجارتی حیثیت میں حصہ لیتا ہے،میڈیا سیل
پی بی ایف

رپورٹ: عبدالمالک

اسلام آباد:(جاگیر نیوز)پاکستان باکسنگ فیڈریشن (پی بی ایف) نے باکسنگ میں قومی نمائندگی کے حوالے سے وضاحت کرتے ہوئے کہا ہے کہ سرکاری قومی نمائندگی اور نجی یا تجارتی بنیادوں پر منعقد ہونے والے پروفیشنل باکسنگ مقابلوں میں شرکت دو الگ معاملات ہیں۔ پاکستان کی نمائندگی ایک اعزاز ہے جو مقابلے، کارکردگی اور باضابطہ انتخاب کے ذریعے حاصل کیا جاتا ہے۔
پی بی ایف کے میڈیا سیل کی جانب سے جاری بیان کے مطابق باکسرز قومی سطح پر مقابلہ کرتے ہیں اور اہم برآعظمی، کامن ویلتھ اور اولمپک مقابلوں سمیت تسلیم شدہ بین الاقوامی ایونٹس میں پاکستان کی نمائندگی کے لیے قابلیت کی بنیاد پر منتخب کیے جاتے ہیں۔بیان میں کہا گیا ہے کہ پروفیشنل باکسنگ مقابلے سرکاری قومی نمائندگی سے مختلف ہوتے ہیں۔ کسی نجی یا پروفیشنل مقابلے میں حصہ لینے والا پاکستانی باکسر اپنی انفرادی یا تجارتی حیثیت میں مقابلہ کرتا ہے۔ محض پاکستانی شہری ہونا اس بات کا ثبوت نہیں کہ مذکورہ پروفیشنل باؤٹ پاکستان یا پاکستان باکسنگ فیڈریشن کی جانب سے ہے۔پی بی ایف نے اس فرق کی وضاحت کرتے ہوئے کہا کہ یہی اصول کرکٹ میں بھی نظر آتا ہے، جہاں کسی پروفیشنل فرنچائز لیگ میں حصہ لینے والا پاکستانی کرکٹر اس مقابلے میں اپنی فرنچائز کی نمائندگی کرتا ہے، خواہ وہ پاکستان کی قومی ٹیم کا رکن ہی کیوں نہ ہو۔بیان کے مطابق باکسنگ میں یہ فرق مزید واضح ہے کیونکہ نجی پروفیشنل مقابلوں میں شرکت کرنے والے بعض باکسرز کو ممکن ہے کبھی بھی قومی ٹیم کی سطح پر پاکستان کی نمائندگی کے لیے منتخب نہ کیا گیا ہو۔پاکستان باکسنگ فیڈریشن نے کہا کہ وہ باکسرز کے پروفیشنل مواقع حاصل کرنے کے حق کا احترام کرتی ہے، تاہم کسی نجی پروفیشنل مقابلے میں شرکت کو پاکستان کی باضابطہ قومی نمائندگی کے طور پر پیش، بیان یا پروموٹ نہیں کیا جانا چاہیے۔
پی بی ایف نے میڈیا اداروں، پروموٹرز، سپانسرز اور دیگر متعلقہ اسٹیک ہولڈرز سے اپیل کی کہ کسی بھی باکسنگ مقابلے یا ایونٹ کو سرکاری قومی نمائندگی کے طور پر پیش، رپورٹ یا پروموٹ کرنے سے قبل پاکستان باکسنگ فیڈریشن سے اس کی تصدیق کرلی جائے۔فیڈریشن نے اس عزم کا اظہار کیا کہ باکسنگ میں قومی نمائندگی کے وقار کو برقرار رکھنے کے ساتھ ساتھ مقابلوں کی سرکاری حیثیت اور پاکستان کی نمائندگی کرنے والے کھلاڑیوں سے متعلق معلومات درست اور شفاف انداز میں عوام تک پہنچائی جائیں گی۔