نئے صوبے اور قومی اتفاق رائے

تحریر:حمید علی

پاکستان میں نئے صوبوں کے قیام کی بحث ایک مرتبہ پھر قومی سیاسی منظرنامے پر اہمیت اختیار کرتی دکھائی دے رہی ہے۔ اٹھائیسویں آئینی ترمیم کے حوالے سے سامنے آنے والی تجاویز اور نئے صوبوں کے قیام کے لیے ممکنہ ریفرنڈم کی تجویز نے ایک نئی بحث کو جنم دیا ہے۔ تاہم یہ بات واضح رہنی چاہیے کہ اٹھائیسویں آئینی ترمیم ابھی منظور نہیں ہوئی اور نہ ہی نئے صوبوں کے قیام کے حوالے سے کوئی حتمی آئینی فیصلہ سامنے آیا ہے۔ فی الحال یہ تجاویز اور امکانات سیاسی و آئینی مکالمے کا حصہ ہیں۔ مجوزہ طریقہ کار میں عوامی رائے حاصل کرنے کے لیے ریفرنڈم اور اس کے نتائج کو پارلیمان کی منظوری کے لیے پیش کرنے کا تصور بھی شامل ہے۔ اگر اس معاملے کو سیاسی مفادات سے بالاتر ہو کر دیکھا جائے تو پاکستان میں نئے صوبوں کا قیام محض انتظامی تبدیلی نہیں بلکہ ایک اہم قومی ضرورت بن سکتا ہے۔پاکستان ایک وسیع رقبے اور بڑی آبادی پر مشتمل ملک ہے۔ آبادی میں مسلسل اضافے اور شہری و دیہی ضروریات کے پھیلاؤ نے موجودہ انتظامی ڈھانچے پر غیر معمولی دباؤ پیدا کر دیا ہے۔ کئی ایسے علاقے ہیں جہاں شہریوں کو بنیادی سہولیات کے حصول کے لیے طویل فاصلے طے کرنا پڑتے ہیں۔ دور دراز اضلاع کے مسائل صوبائی دارالحکومتوں تک پہنچتے پہنچتے اکثر اپنی اہمیت کھو دیتے ہیں۔ تعلیم۔ صحت۔ روزگار۔ صاف پانی اور بنیادی ڈھانچے کی فراہمی میں عدم توازن نمایاں ہے۔ ایسے حالات میں چھوٹے اور مؤثر انتظامی یونٹس کا قیام عوام اور حکومت کےدرمیان فاصلے کم کرنے کا ذریعہ بن سکتا ہے۔دنیا کے مختلف ممالک نے انتظامی بہتری اور عوامی ضروریات کے پیش نظر اپنے انتظامی یونٹس کی تشکیل نو کی ہے۔ ان تجربات سے یہ حقیقت سامنے آتی ہے کہ انتظامی اکائیوں کی تشکیل کا مقصد صرف نقشے پر نئی سرحدیں کھینچنا نہیں ہوتا بلکہ اختیارات کو عوام کے قریب منتقل کرنا اور حکومتی وسائل کی منصفانہ تقسیم یقینی بنانا ہوتا ہے۔ پاکستان میں بھی نئے صوبوں کی تشکیل کو اسی زاویے سے دیکھنے کی ضرورت ہے۔ جنوبی پنجاب کے عوام کو اپنے مسائل کے حل کے لیے لاہور کے بجائے اپنے علاقے میں ایک بااختیار صوبائی مرکز میسر ہو تو انتظامی معاملات میں بہتری آ سکتی ہے۔ اسی طرح ہزارہ اور دیگر علاقوں میں نئے صوبوں کے مطالبات کو بھی سنجیدگی سے زیر غور لانا چاہیے۔تاہم نئے صوبوں کا معاملہ صرف انتظامی سہولت تک محدود نہیں۔ اس کے ساتھ سیاسی نمائندگی۔ وسائل کی تقسیم۔ شناخت۔ زبان اور تاریخی و ثقافتی وابستگی جیسے حساس پہلو بھی جڑے ہوئے ہیں۔ اس لیے کسی بھی فیصلے میں مقامی آبادی کی خواہشات کو بنیادی اہمیت حاصل ہونی چاہیے۔ عوام کی مرضی کے بغیر مسلط کیا گیا انتظامی ڈھانچا مسائل حل کرنے کے بجائے نئے اختلافات پیدا کر سکتا ہے۔ یہی وجہ ہے کہ ریفرنڈم کی تجویز اہمیت رکھتی ہے۔ اگر متعلقہ علاقوں کے عوام سے براہ راست رائے لی جائے تو نئے صوبوں کے قیام کو جمہوری بنیاد فراہم ہو سکتی ہے۔ البتہ ریفرنڈم کے سوالات۔ طریقہ کار اور نتائج کی قانونی حیثیت پہلے سے واضح کرنا ضروری ہوگا۔اس پورے معاملے میں سیاسی جماعتوں کا اتفاق رائے سب سے اہم شرط ہے۔ اٹھائیسویں آئینی ترمیم جیسی بڑی آئینی تبدیلی کسی ایک جماعت یا حکومت کی خواہش پر آگے نہیں بڑھنی چاہیے۔ پاکستان کی سیاسی تاریخ گواہ ہے کہ قومی نوعیت کے فیصلے اسی وقت دیرپا ثابت ہوتے ہیں جب ان پر سیاسی قوتوں کے درمیان وسیع اتفاق موجود ہو۔ وفاقی حکومت۔ اپوزیشن جماعتوں۔ صوبائی حکومتوں اور متعلقہ علاقوں کی سیاسی قیادت کو ایک میز پر بیٹھ کر اس معاملے پر سنجیدہ مکالمہ کرنا ہوگا۔ اگر کسی جماعت کو یہ خدشہ ہو کہ نئے صوبوں کی تشکیل کے پیچھے سیاسی یا انتخابی مفادات کارفرما ہیں تو اتفاق رائے پیدا کرنا مشکل ہو جائے گا۔ اس لیے ضروری ہے کہ تمام جماعتیں پہلے اصولی بنیادوں پر متفق ہوں اور پھر آئینی و انتظامی خدوخال طے کیے جائیں۔آئینی اعتبار سے بھی اس عمل کے تقاضے واضح ہیں۔ پاکستان کے آئین کے آرٹیکل 239 کے تحت آئینی ترمیم کے لیے پارلیمان کے دونوں ایوانوں میں دو تہائی اکثریت درکار ہوتی ہے۔ اگر کسی ترمیم کے نتیجے میں کسی صوبے کی حدود متاثر ہوں تو متعلقہ صوبائی اسمبلی کی دو تہائی اکثریت سے منظوری بھی لازمی ہے۔ لہٰذا ریفرنڈم کو آئینی عمل کا متبادل نہیں سمجھا جا سکتا۔ عوامی رائے کے بعد بھی پارلیمانی اور صوبائی آئینی تقاضے پورے کرنا ہوں گے۔ یہی طریقہ اس پورے عمل کو قانونی اور جمہوری اعتبار سے مضبوط بنا سکتا ہے۔نئے صوبوں کے قیام کے ساتھ وسائل کی تقسیم کا سوال بھی غیر معمولی اہمیت رکھتا ہے۔نئے صوبے کے لیے اسمبلی،پولیس سیکریٹریٹ، انتظامی عمارتوں،عدالتی اداروں، اور دیگر محکموں کا قیام درکار ہوگا۔ اس کے ساتھ مالی وسائل اور محصولات کی تقسیم کا نیا نظام بھی تشکیل دینا پڑے گا۔ اگر نئے صوبے قائم کر دیے جائیں لیکن ان کے پاس مالی خودمختاری اور ترقیاتی منصوبوں پر عمل درآمد کی صلاحیت نہ ہو تو یہ اقدام مطلوبہ نتائج حاصل نہیں کر سکے گا۔ اس لیے صوبوں کی تعداد بڑھانے کے ساتھ قومی مالیاتی کمیشن اور مالیاتی وسائل کی تقسیم کے معاملات پر بھی جامع منصوبہ بندی ضروری ہے۔یہ بھی ضروری ہے کہ نئے صوبوں کی تشکیل کو سیاسی جماعتوں کے انتخابی وعدوں یا اقتدار کے حصول کا ذریعہ نہ بنایا جائے۔ پاکستان کو مضبوط اداروں اور مؤثر طرز حکمرانی کی ضرورت ہے۔ نئے صوبوں کی کامیابی اسی وقت ممکن ہے جب اختیارات نچلی سطح تک منتقل ہوں۔ ضلعی حکومتوں کو فعال بنایا جائے اور مقامی نمائندوں کو اپنے علاقوں کے فیصلے کرنے کا حقیقی اختیار دیا جائے۔محض نئے دارالحکومت اور نئی وزارتیں قائم کر دینا انتظامی اصلاحات نہیں کہلا سکتا۔

50% LikesVS
50% Dislikes

اپنا تبصرہ بھیجیں