خانیوال سے امریکا تک

ٹیکنالوجی نے کاروبار اور رابطوں کے طریقے یکسر بدل دیئے

تحریر:حمید علی

دنیا میں ٹیکنالوجی نے کاروبار اور رابطوں کے طریقے یکسر بدل دیے ہیں۔ آج کوئی شخص اپنے گھر میں بیٹھ کر دنیا کے کسی بھی ملک میں کاروبار کر سکتا ہے۔ خرید و فروخت سے لے کر مالی لین دین تک ہر کام چند لمحوں میں مکمل ہو جاتا ہے۔ لیکن اس سہولت کے ساتھ جرائم کے ایسے طریقے بھی سامنے آئے ہیں جن میں مجرم ایک ملک میں بیٹھ کر دوسرے ملک کے شہریوں کو نشانہ بناتے ہیں۔ خانیوال سے تعلق رکھنے والے فہیم اکرم کی گرفتاری اسی بدلتی ہوئی صورت حال کی ایک اہم مثال ہے جس نے بین الاقوامی سطح پر توجہ حاصل کی ہے۔میڈیا رپورٹس کے مطابق فہیم اکرم امریکا میں تقریباً 35 ارب پاکستانی روپے مالیت کے مبینہ فراڈ کے الزام میں مطلوب تھے۔ ان پر جعلی امریکی ڈاک ٹکٹوں کی آن لائن فروخت میں ملوث ہونے کا الزام ہے۔ امریکی حکام نے ان کی گرفتاری میں مدد دینے والی معلومات فراہم کرنے پر ایک لاکھ ڈالر انعام کا اعلان کیا تھا۔ بعد ازاں انہیں لاہور سے گرفتار کیا گیا اور لاہور کی ضلع کچہری میں پیش کیا گیا۔ نیشنل سائبر کرائم انویسٹی گیشن ایجنسی کی درخواست پر عدالت نے پانچ روزہ جسمانی ریمانڈ منظور کرتے ہوئے انہیں تفتیشی ادارے کے حوالے کر دیا۔اس معاملے کا بنیادی تعلق امریکی ڈاک ٹکٹوں کی مبینہ جعل سازی اور ان کی آن لائن فروخت سے ہے۔ ڈاک ٹکٹ بظاہر کاغذ کا ایک چھوٹا سا ٹکڑا ہوتا ہے لیکن کسی بھی ملک کے ڈاک کے نظام میں اس کی باقاعدہ مالی حیثیت ہوتی ہے۔ جب جعلی ڈاک ٹکٹ اصل ظاہر کر کے فروخت کیے جائیں تو خریدار اپنی رقم کے بدلے ایسی چیز حاصل کرتا ہے جس کی حقیقی حیثیت موجود نہیں ہوتی۔ اس طرح ایک بظاہر معمول کی خریداری مالی دھوکا دہی میں تبدیل ہو جاتی ہے۔ فہیم اکرم کے خلاف سامنے آنے والا الزام بھی اسی نوعیت کی مبینہ جعل سازی سے متعلق ہے۔اس واقعے کا سب سے حیران کن پہلو اس کی جغرافیائی وسعت ہے۔ مبینہ سرگرمیوں کا تعلق پاکستان سے تھا جب کہ خریدار امریکا میں موجود تھے۔ اس سے اندازہ ہوتا ہے کہ انٹرنیٹ نے جرائم کی دنیا میں بھی سرحدوں کی اہمیت کم کر دی ہے۔ کسی شخص کو دھوکا دینے کے لیے اب اس کے شہر یا ملک میں موجود ہونا ضروری نہیں رہا۔ ایک ویب سائٹ یا آن لائن کاروباری پلیٹ فارم کے ذریعے ہزاروں میل دور بیٹھے افراد سے رابطہ کیا جا سکتا ہے۔ یہی سہولت جب غلط مقاصد کے لیے استعمال ہوتی ہے تو متاثرہ افراد کے لیے اصل فروخت کنندہ تک پہنچنا بھی مشکل ہو جاتا ہے۔اس مبینہ فراڈ کے پیچھے مالی مفاد ایک نمایاں محرک دکھائی دیتا ہے۔ جعلی اشیا کو اصل ظاہر کر کے فروخت کرنا اور مختلف علاقوں کےخریداروں سے رقم وصول کرنا مالی دھوکا دہی کا ایک طریقہ ہے۔تاہم اس مقدمے میں 35 ارب روپے کی مبینہ رقم کس طرح حاصل کی گئی۔کتنے خریدار متاثر ہوئے۔ادائیگیاں کن ذرائع سے وصول کی گئیں اور کیا اس سرگرمی میں مزید افراد بھی شامل تھے۔ یہ تمام سوالات اہم ہیں۔ان کے جوابات تفتیشی ریکارڈ اور ڈیجیٹل شواہد کی جانچ سے ہی سامنے آ سکتے ہیں۔کسی ایک ملزم کی گرفتاری سے پورے معاملے کی تفصیلات خود بخود واضح نہیں ہو جاتیں۔
یہاں ایک اہم بات سمجھنے کی ضرورت ہے کہ آن لائن فراڈ ہمیشہ پیچیدہ تکنیکی حملوں کے ذریعے نہیں کیا جاتا۔بعض اوقات جعل ساز ایک عام کاروباری شناخت اختیار کرتے ہیں۔خوب صورت ویب سائٹ بناتے ہیں،مصنوعات کی دل کش تصاویر لگاتے ہیں اور خریداروں کو کم قیمت یا غیر معمولی رعایت کی پیشکش کرتے ہیں۔صارف ان چیزوں کو دیکھ کر اعتماد کر لیتا ہے اور رقم منتقل کر دیتا ہے۔ بعد میں معلوم ہوتا ہے کہ فروخت کی جانے والی چیز جعلی تھی یا سرے سے موجود ہی نہیں تھی۔اس طرح صارف اپنی رقم سے محروم ہو جاتا ہے اور متعلقہ شخص کی شناخت تلاش کرنا دشوار ہو جاتا ہے۔ہمارے ہاں بھی بہت سے لوگ سوشل میڈیا اور مختلف آن لائن پلیٹ فارمز کے ذریعے خریداری کرتے ہیں۔بعض افراد کم قیمت اور فوری منافع کے لالچ میں ایسے صفحات پر اعتماد کر لیتے ہیں جن کی کوئی مستند کاروباری شناخت موجود نہیں ہوتی۔جعلی ملازمتوں کے اشتہارات۔انعام نکلنے کے پیغامات اور آن لائن سرمایہ کاری کی پرکشش اسکیمیں بھی اسی نوعیت کے جال ہیں۔ کسی کو بتایا جاتا ہے کہ معمولی رقم جمع کروا کر بڑی آمدنی حاصل کی جا سکتی ہے تو کسی سے تحفہ یا انعام وصول کرنے کے نام پر فیس مانگی جاتی ہے۔ان پیشکشوں کا مقصد اکثر صارف کی رقم یا ذاتی معلومات حاصل کرنا ہوتا ہے۔عوام کو چاہیے کہ آن لائن خریداری سے پہلے متعلقہ ویب سائٹ اور فروخت کنندہ کی ساکھ ضرور جانچیں۔صرف خوب صورت اشتہار یا دوسرے صارفین کے تبصروں کو اعتماد کی بنیاد نہ بنائیں۔ غیر معمولی رعایت اور فوری ادائیگی کے دباؤ کو خطرے کی علامت سمجھیں۔ اپنے بینک اکاؤنٹ کی تفصیلات پاس ورڈ، اے ٹی ایم پن اور موبائل پر موصول ہونے والا تصدیقی کوڈ کسی دوسرے شخص کو فراہم نہ کریں۔نامعلوم لنکس پر کلک کرنے سے گریز کریں اور کسی مشکوک ویب سائٹ پر اپنی مالی معلومات درج نہ کریں۔ اگر کسی کے ساتھ دھوکا دہی ہو جائے تو متعلقہ بینک اور سائبر کرائم ادارے کو فوری اطلاع دیں۔
اس معاملے میں امریکی حکام کی جانب سے ایک لاکھ ڈالر انعام کا اعلان اور پاکستان میں نیشنل سائبر کرائم انویسٹی گیشن ایجنسی کی کارروائی بین الاقوامی تعاون کی اہمیت بھی واضح کرتی ہے۔ سائبر جرائم میں مالیاتی ریکارڈ۔ آن لائن اکاؤنٹس اور الیکٹرانک شواہد بنیادی حیثیت رکھتے ہیں۔جب جرم ایک ملک میں بیٹھ کر دوسرے ملک کے شہریوں کے خلاف کیا جائے تو تحقیقات کے لیے متعلقہ اداروں کے درمیان معلومات کا تبادلہ ضروری ہو جاتا ہے۔اس مقدمے میں ملزم کی گرفتاری اسی نوعیت کی کارروائی کا اہم حصہ ہے۔پاکستان کے اداروں کے لیے بھی ضروری ہے کہ تحقیقات شواہد کی بنیاد پر آگے بڑھائیں اور قانون کے تقاضوں کو پورا کریں۔فہیم اکرم کی گرفتاری نے ڈیجیٹل دنیا کے ایک ایسے رخ کو نمایاں کیا ہے جسے عام صارف اکثر نظر انداز کر دیتا ہے۔ انٹرنیٹ پر موجود ہر کاروبار حقیقی نہیں ہوتا اور ہر پیشکش قابلِ اعتماد نہیں ہوتی۔ کبھی سستی مصنوعات کا لالچ دیا جاتا ہے تو کبھی چند دنوں میں بڑی رقم کمانے کا خواب دکھایا جاتا ہے۔ ان ہی ترغیبات کے ذریعے لوگوں کی جمع پونجی ہتھیائی جاتی ہے۔35 ارب روپے کے اس مبینہ فراڈ کا معاملہ ہمارے لیے ایک واضح تنبیہ ہے کہ جدید ٹیکنالوجی سے فائدہ اٹھانے کے ساتھ اپنی حفاظت کا شعور بھی ضروری ہے۔یاد رکھیں کہ ڈیجیٹل دنیا میں ایک لمحے کی لاپروائی برسوں کی جمع پونجی کو خطرے میں ڈال سکتی ہے۔