ایکسپورٹ فنانس اسکیم کے غلط استعمال پر کارروائی کا آغاز
تمام مالکان اور ڈائریکٹرز مفرور ہیں، مقدمہ درج، گرفتاری کیلئے دو ٹیمیں تشکیل دیدی گئیں۔ فوٹو: ایس بی پی
کراچی: کسٹمز پوسٹ کلیئرنس آڈٹ نے 6 گڈز ڈیکلریشن کے ذریعے ایکسپورٹ فنانس اسکیم کی سہولت کے غلط استعمال اور ریونیو کی مد میں قومی خزانے کو پہنچنے والے نقصان کی نشاندہی کرکے کارروائی کا آغاز کردیا ہے۔
ڈائریکٹر پوسٹ کلئیرنس آڈٹ ساؤتھ شیراز احمد نے بتایا کہ ڈی جی پی سی اے کی ہدایات کی روشنی میں اس فراڈ میں ملوث میسرز فئیرڈیل ٹیکسٹائل کے خلاف مقدمہ درج کرلیا گیا ہے۔
ذرائع نے بتایا کہ ڈائریکٹر پوسٹ کلیئرنس آڈٹ کو اطلاع موصول ہوئی تھی کہ میسرز فیئرڈیل ٹیکسٹائل کراچی کی جانب سے ایکسپورٹ فنانس اسکیم کی سہولت کا غلط استعمال کیا جارہا ہے، جس پر پی سی اے افسران پر مشتمل آڈٹ ٹیم تشکیل دی گئی جس میں اے ڈی محمد سرفراز، اے او فہد اقبال اور اے او عمران حیدر شامل تھے۔
آڈٹ ٹیم نے کسٹمز ایکٹ کے سیکشن 26 بی کے تحت میسرز فیئرڈیل ٹیکسٹائل کے احاطے میں ای ایف ایس سامان کی فزیکل جانچ پڑتال کی اور ایف بی آر کے پاس دستیاب کسٹم، سیلز ٹیکس اور انکم ٹیکس کے اعداد و شمار کی بنیاد پر ابتدائی ڈیسک آڈٹ کیا، تفتیش کے بعد سیکشن 32A کے تناظر میں مالی فراڈ کی ایک ایف آئی آر پوسٹ کلیئرنس آڈٹ ساؤتھ نے درج کرادی ہے۔
رپورٹ میں بتایا گیا ہے کہ آڈٹ کے دوران میسرز فیئرڈیل کا فیکٹری مینوفیکچرنگ ایریا بند پایا گیا، مشینیں خستہ حالت میں تھیں، ایسا معلوم ہوتا ہے کہ فیکٹری طویل عرصے سے غیر فعال ہے، EFS سامان کے علاوہ، درآمد کنندہ متعدد اقسام اور معیار کے کپڑوں کو درآمد کرتا ہوا پایا گیا جس سے یہ ظاہر ہوتا ہے کہ درآمد کنندہ سامان کو درآمد کرنے اور مقامی مارکیٹ میں فروخت کے لیے مینوفیکچرنگ اسٹیٹس کا غلط استعمال کر رہا ہے۔
پی سی اے کی ٹیمیں ملزمان کی گرفتاری کے لیے کوششیں کر رہی ہیں، میسرز فیئرڈیل ٹیکسٹائل کے تمام مالکان اور ڈائریکٹرز مفرور ہیں، گرفتاری کیلیے دو ٹیمیں تشکیل دی گئی ہیں اور تمام سمندری اور زمینی کسٹم ایکسپورٹ کلکٹریٹس کو بھی چوکس رہنے کے لیے الرٹ کر دیا گیا ہے کیونکہ ملزم درآمد کنندہ ملک سے فرار ہونے کی کوشش کرسکتا ہے۔
